Президенти Тоҷикистон Эмомалӣ Раҳмон ба Президенти Ҷумҳурии Арабии Миср Абдулфаттоҳ ас-Сисӣ ба муносибати пирӯзӣ дар интихоботи президентии ин кишвар барқияи табрикӣ ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон изҳори итминон мешавад, ки тайи давраи нави фаъолият кишварҳои Тоҷикистону Миср муколамаи созандаро чи дар сатҳи дуҷониба ва чи дар арсаи байналмилалӣ ба манзури густариши бештари ҳамкориҳояшон дар ҳамаи соҳаҳои мавриди таваҷҷуҳи тарафайн, аз ҷумла иқтисоду тиҷорат, илму маорифу фарҳанг ва мубориза бо хатару таҳдидҳои ҷаҳонӣ, идомаи самарабахш хоҳанд дод.
«Бо истифода аз фурсати нек ва таъкиди омодагии ҷониби Тоҷикистонро барои саъю талошҳои муштарак дар ҷодаи таъмиқу тавсеаи муносибатҳои дӯстӣ ва ҳамкориҳои гуногунҷанбаи Тоҷикистону Миср муҷаддадан менамоям», – омадааст дар барқия.
Бино ба маълумоти хабаргузории РБК, дар маъракаи интихоботи президенти Миср ба ҷонибдории сарвари давлати амалкунандаи ин кишвар Абдулфаттоҳ ас-Сисӣ 97% ё худ 21 млн. 835 ҳазору 387 интихобкунандагон овоз доданд.
