Низоми интиқоли пули «Лидер», ки иҷозатномаашро Бонки марказии Русия бозхонд кард, назди бонкҳои Тоҷикистон уҳдадориҳояшро иҷро накарда, ба онҳо қарздор шуд.
Дар ин робита Бонки миллии Тоҷикистон аз дигар низомҳои интиқоли пули Русия кафолати пардохтро дар сурати бозхонд шудани иҷозатнома талаб кард.
Бонки миллии Тоҷикистон хотиррасон мекунад, ки ҳанӯз соли 2014 дар робита ба қатъи кори низоми байнулмилалии интиқоли пули «Migom» ва аз феҳристи операторони интиқоли пули Бонки Русия хориҷ шудани он, ташкилотҳои қарзии Тоҷикистон, ки бо он ҳамкорӣ доштанд, зиёни назарраси молӣ дида, то ҳол ин уҳдадориҳои иҷро нашудаанд.
Мушкилӣ бо низоми интиқоли пули «CONTAKT» дар соли 2014 низ хотиррасон мешавад, ки нисбати менеҷери он Александр Миронов бо далели фаъолияти ғайриқонунии бонкӣ ва пулшӯии ҳармоҳаи 3,5 млрд. рубл парувнадаи ҷиноӣ боз шуда буд. Лекин баъди чанде фаъолияти ин низом дубора барқарор шуда, гирифтани пул боз имконпазир гардид.
Фаъолияти «Лидер» қатъ шуд
Низоми интиқоли пули «Лидер» аз Феҳристи операторони низоми интиқоли пули Бонки Русия хориҷ шуда, аз фаъолият бозмонд.
«Тибқи маълумоти ташкилотҳои қарзии Тоҷикистоон, уҳдаориҳои ин низом назди онҳо аз маблағҳои зиёд иборат аст. Дар шароити ҳозира ин далел барои вазъи молии ташкилотҳои қарзӣ ва ба сурати умум низоми бонкӣ таъсири манфӣ дорад», – қайд карданд дар Бонки миллӣ.
Аз ин рӯ, Бонки миллии Тоҷикистон бо мақсади таъмини кафолати уҳдадориҳои молӣ аз ҷониби низомҳои пардохтӣ ташкилотҳои қарзиро уҳдадор намуд, ки зимни ҳамкорӣ бо низомҳои интиқоли пул кафолат талаб намоянд.
Дар ҳамин ҳол, дар Бонки миллӣ шарҳ медиҳанд, ки расмиёт ва қоидаҳои низоми интиқоли пул ба гирандагони маблағ имкон медиҳанд, ки пулро тариқи ташкилотҳои қарзӣ ё воҳидҳои сохтории онҳо баъди чанд дақиқаи фиристодан дастрас намоянд, аммо ҳисоббаробарӣ байни низоми интиқоли пули хориҷӣ ва ташкилотҳои қарзии Тоҷикистон метавонад муддати 3-5 рӯз анҷом ёбад.
Баъди «Золотая корона», «Contact» ва «Юнистрим» аз лиҳози истифода дар Тоҷикистон «Лидер» дар зинаи чорум қарор дошт.
Дар Бонки миллии Тоҷикистон дар бораи додани пул ба шахсоне, ки тариқи ин низом ба онҳо пул фирситода шудааст ва чӣ миқдор қарздор будани ин низом назди бонкҳои Тоҷикистон маълумот надоданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
