Ҳаракати ҳама гуна воситаҳои нақлиёти автомобилӣ дар дохили нақби “Хатлон” (собиқ “Чормағзак”), ки дар роҳи мошингарди Душанбе – Ваҳдат – Кӯлоб – Хоруғ воқеъ аст, аз санаи 29 то 30 сентябри соли 2018 муваққатан манъ мешавад.
Бино ба маълумоти Ваозорати нақлиёти ҷумҳурӣ, ин рӯзҳо дар нақб ҷиҳати таъмини бехатарии ҳаракат дар роҳ, ҳифзи ҳаёт ва саломатии иштироккунандагони ҳарақат дар роҳ, пешгирии сабабҳои ба вуқӯъ пайвастани ҳодисаҳои роҳу нақлиётӣ корҳои профилактикӣ гузаронида мешаванд.
Зимнан зикр мегардад, ки ҳаракати воситаҳои нақлиёт дар ин рӯзҳо тавассути ағбаи “Чормағзак” ба роҳ монда мешавад.
Қобили зикр аст, ки ҳаракати воситаҳои нақлиёт тариқи ин нақб аввали моҳи июли ҳамин сол низ тақрибан ба муддати як моҳ манъ шуда буд. Он вақт бар асари заминларза дар чанде аз қитъаҳои роҳ фурӯравии хок ба амал омада, корҳои таъмиру барқарорсозӣ сурат гирифт.
Амалисозии лоиҳаи сохтмони нақби «Чормағзак» моҳи марти соли 2010 оғоз гардид. Лоиҳа аз ҷониби ширкати чинии «Чайна Роуд» аз ҳисоби қарзи ҳукумати Чин амалӣ шуд. Арзиши умумии лоиҳа наздики 300 млн. сомонӣ (тақрибан 70 млн. доллар бо қурби ҳамонвақта)-ро ташкил дод.
Баъди мавриди баҳрабардорӣ қарор гирифтани нақб масофаи роҳи Душанбе – Ваҳдат – Кӯлоб дар муқоиса бо масофаи роҳи Душанбе – Бохтар – Кӯлоб 100 километр камтар шуд. Масофаи умумии нақб 4 ҳазору 430 метрро ташкил медиҳад. Аввали соли 2014 бо қарори ҳукумат, нақби «Чормағзак» ба нақби «Хатлон» табдили ном кард.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
