Ширкати ҳавопаймоии SCAT-и Қазоқистон аз 14 декабр ба иҷрои парвозҳо бо хатсайри Остона – Душанбе – Остона оғоз мекунад.
“Ин хатсайри нав мустақиман шаҳри Душанберо бо пойтахти Қазоқистон пайваст хоҳад кард”, – хабар медиҳад дафтари матбуоти ҶСК “Фурудгоҳи байнулмилалии Душанбе”.
Бино ба иттилои манбаъ, парвозҳо рӯзҳои ҷумъа ва якшанбе дар ҳавопаймоҳои Bombardier CRJ200 анҷом ёфта, фурӯши билетҳо ба ин хатсайр алакай оғоз шудааст.
Зимни рӯнамоии ифтитоҳи хатсайри нав рӯзи 13 декабр дар Остона ноиби президенти ширкати ҳавопаймоии SCAT Николай Буряков изҳор доштааст, ки арзиши билет ба як самт аз 44 ҳазор танга (118 доллар) ва ба ду самт – аз 86 ҳазор танга (232 доллар)-ро ташкил медиҳад.
“Ифтитоҳи хатсайр талаботи замон буда, ба таърихи навтарини рушди муносибатҳои гуногунҷабҳа байни кишварҳои мо созгор аст. Ба туфайли ҳамкориҳои бисёрҷонибаи чандинсола миёни Қазоқистону Тоҷикистон имкон фароҳам омад, ки муносибатҳои дуҷониба дар сатҳи сифатан нав қарор гиранд. Имрӯз метавон гуфт, ки созишҳои раҳбарияти кишварҳо доир ба тавсеъаи ҷуғрофияи парвозҳо ба марҳилаи нав дар татбиқи амалӣ расиданд”, – иброз доштааст зимни чорабинӣ сафири Тоҷикистон дар Қазоқистон Назирмад Ализода.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
