Давоми соли гузашта ҳаҷми умумии маблағи пардохтнашуда барои истифодаи нерӯи барқ 363,6 млн. сомонӣ афзуд. Дар ин бора охири ҳафтаи гузашта дар ҷаласаи ҷамъбасти фаъолияти ширкати “Барқи тоҷик” дар соли 2018 бо иштироки муовини сарвазири Тоҷикистон Азим Иброҳим маълумот дода шуд.
Қайд шуд, ки қарздорони асосӣ назди ширкати “Барқи тоҷик” айни замон Агентии обёрӣ ва беҳдошти замин – 66,2 млн., хоҷагиҳои фермерӣ – 25,6 млн., корхонаҳои обу корез – 10,1 млн. ва ташкилоту муассисаҳои буҷетӣ – 7,3 млн. сомонӣ мебошанд.
Ширкати “Барқи тоҷик” аҳолиро қарздори аз ҳама бештар номид, ки тӯли солҳои соҳибистиқлолӣ аз ширкат 80,4 млн. сомонӣ қарздорӣ доштааст.
Ҷамъоварии маблағи истифодаи нерӯи барқ нисбат ба соли пешин дар ҳаҷми 314,5 млн. сомонӣ зиёдтар шудааст.
“Бо вуҷуди нисбат ба соли пешин ба андозаи 0,6% кам шудани сатҳи талафот, қоидаҳои истифодаи нерӯи барқ аз ҷониби истеъмолгарон то ҳол дар сатҳи зарурӣ риоя намешаванд”, – таъкид шудааст дар ҷаласа.
Барои пешгирии минбаъд афзудани қарзҳо Азим Иброҳим ба ширкати “Барқи тоҷик” дастур додааст, ки вазъи техникии низоми энергетикӣ беҳтар гардонида шуда, давра ба давра гузариш ба низоми нави баҳисобгирии истифодаи нерӯи барқ таъмин ва низоми биллингии баҳисобгирии истифодаи нерӯи барқ роҳандозӣ шавад.
Ӯ ҳамчунин пешниҳод намудааст, ки сатҳи касбии кормандони ин бахш баланд бардошта шуда, ҳарҷӣ бештар дахолати шахс ба кори таҷҳизоти баҳисобгирии истифодаи нерӯи барқ камтар гардад.
Соли гузашта дар ҷумҳурӣ беш аз 16,2 млрд. кВт/соат нерӯи барқ истеҳсол шудааст, ки нисбат ба соли 2017 – 860,4 млн. кВт/соат бештар мебошад.
Дар ҷаласа таъкид шудааст, ки соли гузашта дар баробари мавриди баҳрабардорӣ қарор гирифтани иқтидорҳои нави энергетикӣ, корҳои ивази чархаи гирдроагрегати №9-и нерӯгоҳи Норак низ ба иҷро расиданд, ки ба афзудани иқтидори ин чарха аз 160 Мвт то ба нишондишандаи лоиҳавӣ – 335 МВт имкон дод.
Ҳамчунин дар натиҷаи аз таъмири асосӣ баровардани Маркази барқу гармидиҳии Душанбе иқтидори он бо истифода аз гази табиӣ аз 20 Мвт ва 50 Гкал/соат то ба 120 Мвт нерӯи барқ ва 180 Гкал/соат гармӣ расонида шуд.
Бо мо дар Telegram, Facebook, Instagram, Viber, Яндекс.Дзен, OK ва Google Новости бимонед.
