Кумитаи дин, танзими анъана ва ҷашну маросимҳои назди ҳукумати Тоҷикистон ҷиҳати интихоби роҳбаладони мавсими «Ҳаҷ-2019» озмун эълон кард.
Бино ба иттилои дафтари матбуоти Кумита, талаботи асосӣ барои иштирокчиёни озмун – огоҳии комил доштан аз аҳкоми маносики ҳаҷ; доштани малакаи хуби ташкилотчигиву муошират бо ҳоҷиён; ҷисман обутобёфта будан; дар шароити душвор кор карда тавонистан ва донистани забони арабӣ ё англисӣ дар сатҳи муошират муқаррар шудааст.
“Дар озмуни роҳбаладони мавсими "Ҳаҷ-2019" нафарони синнашон аз 30 то 60-сола иштирок карда метавонанд, – қайд мешавад дар хабар. – Хоҳишмандон метавонанд ҳуҷҷатҳои худро аз 25 январ то 15 феврали соли 2019 ба Кумита пешниҳод намоянд”.
Таъкид мешавад, ки тибқи муқаррароти ҷониби Арабистони Саудӣ аз нафароне, ки дар панҷ соли ахир ҳадди ақал як маротиба маносики ҳаҷро ба ҷо овардаанд, дар ҳаҷми 534 доллари амрикоӣ иловапулӣ ситонида мешавад.
Соли 2018 ҳамроҳ бо ҳайати хизматгузорӣ 6 ҳазору 520 нафар шаҳрвандони Тоҷикистон ба зиёрати Хонаи Худо шарафёб гардиданд. Маблағи харҷи адои маросими ҳаҷ барои ҳар кадоме аз тоҷикистониён 33 ҳазору 410 сомониро ташкил дод.
Тавре ба “Азия-Плюс” котиби матбуотии Кумитаи дин Афшин Муқим хабар дод, шумори квотаҳо барои Тоҷикистон дар соли 2019 барои адои маросими ҳаҷ аз ҷониби Арабистони Саудӣ алҳол муқаррар нашуда, ҳамчунин арзиши адои маросими ҳаҷи имсола низ ҳанӯз маълум нест.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
