Дар парлумони Қирғизистон имрӯз зимни баррасии муноқишаи чанде қабл рухдода дар марз бо Тоҷикистон баҳсу музокироти пурҷӯшу хурӯш сурат гирифт, хабар медиҳад агентии иттилоотии 24.kg.
Дар ҷаласаи пушти дарҳои пӯшидаи Жогорку Кенеш (парлумони Қирғизистон) вакил Каромат Орозова пешниҳод намуд, ки ба Оқ-Сой мақоми иншооти стратегӣ дода шавад. Ҳамчунин ӯ дархост намуд, ки шаҳрвандони осебдидаи кишвар зимни муноқиша дар марз Мирбек Ҷӯраев, Улуғбек Жониқулов ва Оқилбек Тӯйчиев бо медали “Данк” қадрдонӣ карда шаванд.
“Ман дархост дорам, ки давлат шахсонеро, ки бе аслиҳа сарҳадро ҳимоя мекунанд, аз лиҳози моддӣ ва маънавӣ дастгирӣ намояд. Вақте мо он ҷо рафтем, мардум дар навбати аввал сулҳу суботро талаб карданд. Бар асари набудани чунин вазъ занон тифлони носолимро ба дунё оварда, ба бемориҳои рӯҳӣ гирифтор мешаванд. Мушкили сарҳадро таъҷилан ҳал кардан зарур аст”, – овардааст гуфтаҳои ӯро 24.kg.
Ӯ ҳамчунин пешниҳод намудааст, ки ба оилаҳои осебдида аз низоъ дар сарҳад дар ҳаҷми 300 ҳазор сом кумаки моддӣ расонида шавад.
Каромат Орозова хоҳиш кардааст, ки имконоти хадамоти марзбонӣ ва мақомоти ҳифзи ҳуқуқ пурзӯр карда шавад. Вакил талаб кардааст, ки дар мавзеи Оқ-Сой мушкили таъминот бо об ва обёрии заминҳо ҳаллу фасл шуда, дар бунгоҳи тиббии маҳаллӣ шумори кормандони тиббӣ зиёд ва шуъбаи ҷарроҳӣ боз гардад.
Қобили зикр аст, ки дар Қирғизистон шаҳрвандоне бо медали “Данк” сарфароз гардонида мешаванд, ки дар хизмати давлатӣ, фаъолияти истеҳсолӣ, илмӣ-техникӣ, эҷодӣ, ҷамъиятӣ ва хайру эҳсонкорӣ ба дастовардҳои назаррас ноил гардида бошанд.
Ёдрас мекунем, ки муноқиша дар сарҳади байни Тоҷикистону Қирғизистон рӯзҳои 13-14 март сурат гирифта, дар ҷараёни он 2 нафар шаҳрванди Тоҷикистон ҳалок ва беш аз 20 тани дигар тоҷикистониён ҷароҳат бардоштанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
