Ширкати ҳавопаймоии Utair субҳи имрӯз 10 нафар мусофиронро, ки ба хатсайри UT804 Душанбе-Маскав билет доштанд, ба парвоз роҳ надод. Дар ин бора ба “Азия-Плюс” тариқи телефон яке аз ин мусофирони ба хатсайр роҳдоданашуда хабар дод.
Мусофир зодаи Регар буда, бино ба гуфтаи ӯ, аз ин шаҳр онҳо ҷор нафар будаанд, ки ду нафарашонро ба парвоз роҳ додаву ду тани дигарро иҷоза надодаанд.
“Бақайдгирӣ соати чори субҳ оғоз гардида, барои саривақт дар он ҳозир будан, мо шабона бо такси аз Регар ба Душанбе омадем. Чор нафар будем. Вақте назди нуқтаи бақайдгирӣ омадем, ду нафарро ба қайд гирифтанду ба мо гуфтанд, ки дар ҳавопаймо дигар ҷой нест ва моро ба қайд намегиранд”, – изҳор намуд ӯ.
Номбурда ҳамчунин қайд кард, ки боз се нафар сокинони Ҳисор ва дигар мусофирон, ҳамагӣ беш аз 10 нафар низ ба парвоз бо ин хатсайр роҳ дода нашудаанд.
“Ба мо хабар доданд, ки бо хатсайри дигар – 4 апрел соати 03:30 дақиқа парвоз мекунем. Ному насаби моро навишта, бағочамонро ҳам гирифтанд. Огоҳ намуданд, ки соати 1-и шаб барои бақайдгирӣ ҳозир шавем”, – гуфт мусофир.
Ҳамчунин зикр шуд, ки билетҳо дар Маскав харида шуд, ин бори аввал нест ва пештар ҳеҷ мушкилие ҷой надошт.
Дар ҳамин ҳол, дар намояндагии ширкати ҳавопаймоии Utair дар Тоҷикистон ба “Азия-Плюс” дар мавриди ин масъала иттилоъ доданд, ки ҳамагӣ 4 нафар мусофирон натавонистаанд бо хатсайри мазкур парвоз кунанд.
“Ҳамарӯза мо бо хатсайри Душанбе-Маскав (Внуково) ду парвоз анҷом медиҳем: UT802 соати 03:30 ва UT804 соати 6:00. Дирӯз бо сабабҳи техникӣ парвоз тариқи хатсайри UT802 бекор шуда, мусофирони ҳарду хатсайрро бо UT804 соати 6:00 фиристодем. Ҳамин тариқ, имрӯз 4 нафар мусофирон парвоз карда натавонистанд. Онҳо пагоҳ бо хатсайри UT802 соати 03:30 ба Маскав парвоз мекунанд”, – хабар дод Ҳусейн Усмонов, намояндаи ширкати ҳавопаймоии Utair.
Ба савол дар бораи ҷуброн шудани зиёни расида ба мусофирон, аз ҷумла дер мондан ба хатсайри дигар пешбинишуда, намояндаи ширкат посух дод, ки барои мусофирон ҳеҷ гуна ҷубронпулӣ пешбинӣ нашудааст.
“Мо ба онҳо пардохти маблағи иқомат дар меҳмонхона, таъминот бо хӯрок ва интиқол (трансфер)-ро ба хатсайри минбаъда пешниҳод кардем, вале онҳо рад карданд”, – илова намуд Усмонов.
Дар ҳамин ҳол
ИЗОБРАЖЕНИЕ
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
