Мақомоти ҳифзи ҳуқуқи Тоҷикистон соли гузашта фаъолияти 15 нуқтаи гайриқонунии мубодилаи асъорро боздоштанд. Дар ин бора зимни ҳисобот ба палатаи болоии парлумон прокурори генералии ҷумҳурӣ Юсуф Аҳмадзода хабар дод.
Ӯ қайд кард, ки зимни назорат аз болои риояи иҷрои қонун дар бораи танзим ва назорати асъор дар ин самт 326 қонуншиканӣ ошкор шудааст.
Бино ба гуфтаи прокурори генералӣ, нисбати гумонбаршудагон 104 парвандаи ҷиноятӣ ва 222 парванда дар бораи ҳуқуқвайронкунии маъмурӣ боз шуда, фаъолияти 15 нуқтаи ғайриқонунии мубодилаи асъор қатъ карда шудааст.
Қобили зикр аст, ки соли 2016 ҳамаи нуқтаҳои мубодилаи асъори аз ҷониби шахсони воқеӣ ва ҳуқуқӣ бозшуда баста шуданд. Аз он замон мувофиқи қонунгузории нав асъорро метавон танҳо дар воҳидҳои дахлдори бонкҳо мубодила намуд. Барои мубодилаи ғайриқонунии асъор вобаста ба вазнинии қонуншиканӣ ҷавобгарии ҷиноятӣ ё маъмурӣ пешбинӣ шудааст.
Доллари пасипардагӣ
Бо вуҷуди сангинтар шудани қонунгузорӣ дар ин самт, афроди ҷудогона бо истифода аз камбуди захираҳои асъор мубодилаи онро ғайриқонунӣ ва пинҳонӣ ба роҳ мемонанд.
Воридкунандагони маҳсулот мефаҳманд, ки барои мубодилаи ғайриқонунии асъор ҳам мубодилакору ҳам худи онҳо ҷазо гирифта метавонанд.
“Лекин мо илочи дигар надорем. Агар дастрасии доллар бар асоси қонунӣ нисбат бо қурби пасттар дар бонкҳо имкон медошт, мо ҳеҷ гоҳ ба ин гуна шахсон муроҷиат нмекардем”, – гуфт ба “Азия-Плюс” яке аз тоҷирон, ки нахост ному насабаш ифшо шавад.
Тоҷир ҳамчунин изҳор намуд, ки ин афроди машғул ба мубодилаи ғайриқонунии асъор долларҳоро аз шиносҳояшон дар яке аз бонкҳо дастрас мекунанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
