Гурӯҳи аввалини шаҳрвандони Тоҷикистон, ки имсол адои маросими ҳаҷро ихтиёр кардаанд, санаи 25 июл ба шаҳрҳои Макка ва Мадина раҳсипор мешаванд.
Дар ин бора ба “Азия-Плюс” котиби матбуотии Кумитаи дин, танзими анъана ва ҷашну маросимҳои миллии ҷумҳурӣ Афшин Муқим хабар дод.
Бино ба гуфтаи ӯ, зоирин ба гурӯҳҳо тақсим шуда, дар муддати 10 рӯз ба макони муқаддаси ислом фиристода мешаванд.
Чун солҳои пешин соли ҷорӣ низ ҳудуди 6 ҳазор нафар тоҷикистониён ба зиёрати Хонаи худо мушарраф гардида, арзиши сафар барои адои маросими ҳаҷ 35 ҳазору 138 сомониро ташкил медиҳад.
Ёдрас мекунем, ки соли 2016 дар Тоҷикистон бобати ба квотаи сафари ҳаҷ дохил накардани шахсони синнашон поинтар аз 40-сола қарор қабул шуд. Кумитаи дин ба ин васила масъалаи навбатпойии хеле зиёд барои адои маросими ҳаҷро ҳал карданӣ буд.
Соли 2018 ҳамроҳ бо ҳайати хизматгузорӣ 6 ҳазору 520 нафар шаҳрвандони Тоҷикистон ба зиёрати Хонаи Худо шарафёб гардиданд. Маблағи харҷи адои маросими ҳаҷ барои ҳар кадоме аз тоҷикистониён 33 ҳазору 410 сомониро ташкил дода буд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
