Дар Тоҷикистон имсол квотаи ҷудошуда барои адои маросими ҳаҷ дар макони муқаддаси ислом пур нашуд. Квотаи ҷудошуда аз ҷониби Арабистони Саудӣ барои соли 2019 иҷро нашуд, хабар дод раиси Кумитаи дин, танзими анъана ва ҷашну маросимҳо Сулаймон Давлатзода зимни нишасти хабарии имрӯза дар Душанбе.
Арабистони Саудӣ имсол ба Тоҷикистон 5 ҳазор квота ҷудо намуда, лекин на ҳамааш истифода шуд, қайд кард Сулаймон Давлатзода. Шумори саҳеҳи зойирини имсола аз Тоҷикистон бо анҷоми маърака маълум мешавад.
Раиси Кумита камшавии таваҷҷуҳ ба адои маросими ҳаҷро ба вазъи номусоиди иқтисодии шаҳрвандон нисбат медиҳад.
“Баъзе хоҳишмандон худро номнавис мекунанд, вале аз иҷрои уҳдадории пардохти маблағ ё таҳияи ҳуҷҷатҳои дахлдор саривақт баромада наметавонанд. Ин асосан ба шароити иқтисодии шаҳрвандон вобаста аст. Пештар дар вилояти Суғд хоҳишмандони адои маросими ҳаҷ то соли 2025 навбат мегирифтанд. Тӯли солҳои охир дар ҳамон ҷо ҳам камшавии сафи онҳо ба назар мерасад”, – гуфт Сулаймон Давлатзода.
Соли равон арзиши ҳаҷ 35 ҳазору 138 сомонӣ ва соли гузашта 33,4 ҳазор сомониро ташкил дода буд. Соли 2018 беш аз 6 ҳазор нафар тоҷикистониён ба зиёрати Хонаи Худо дар Арабистони Саудӣ мушарраф шуданд.
Шояд тоҷикистониён корҳои хайру эҳсон ва ободкориро дар дохили кишвар аз ҳаҷ афзалтар шуморанд. Сохтмони пулу майдонҳои варзишӣ, иншооти муҳофизат аз селу обхезӣ, таъмиру роҳу қабристонҳо ба ивази адои маросими ҳаҷ аллакай чандин сол дар Тоҷикистон роиҷ аст. Сарвари давлат ҳам ба ин корҳо даъват мекунад. Сокинон бо харҷи маблағҳои барои ҳаҷ ҷамъкардаашон иншооти зикршударо месозанд.
Зойиринро бо гулҳо пешвоз гирифтанд.
Гурӯҳи аввали зойирини тоҷик санаи 22 июл бо ҳавопаймои ширкати “Сомон Эйр” ба Арабистони Саудӣ раҳсипор шуданд. Сухангӯи Кумитаи дин Афшин Муқим чанде аз аксҳои истиқболи зойирини тоҷикро дар Арабистони Саудӣ ба ихтиёрамон гузошт, ки дар зер манзуратон мегардонем.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
