Сарбозону афсарони Артиши халқии озодихоҳи Чин дирӯз бо мошинҳои зиреҳпӯш ва силоҳи худ ба ноҳияи Ишкошими ВМКБ омаданд.
Дар гузаргоҳи сарҳадии назоратии “Қулма-Қарасӯ” байни марзи Тоҷикистону Чин сарбозон ва афсарони Қувваҳои Мусаллаҳи Чинро намояндагони Вазорати мудофиаи Тоҷикистон пешвоз гирифтанд, хабар дод ба “Азия-Плюс” котиби матбуотии Вазорати мудофиаи ҷумҳурӣ Ориф Нозимиён.
Ротаи Қувваҳои Мусаллаҳи Чин дар тамринҳои ҳарбии зиддитеррористӣ, ки аз 8 то 14 авгнуст дар ноҳияи бевосита бо Афғонистон ҳамсарҳади Ишкошими ВМКБ доир мегардад, иштирок мекунад.
Дар тамринҳо як баталйони сарбозону афсарони воҳидҳои зудамали Қувваҳои Мусаллаҳи Тоҷикистон ва як ротаи Артиши халқии озодихоҳи Чин иштирок мекунанд.
Низомиёни Тоҷикистону Чин дар тамринҳо амалҳои муштаракро ҳангоми пайдо шудани хатари вуруди террористон аз Афғонистон тариқи Тоҷикистон ба қаламрави Чин мавриди таҷрибаву амал қарор медиҳанд.
Барои иштирок дар тамринҳо ҳамчунин авиатсия, техникаи зиреҳпӯш, артиллерия, силоҳи тирандозӣ низ сафарбар мешавад.
Қобили зикр аст, ки ба ин монанд тамринҳои низомиёни ду кишвар моҳи октябри соли 2016 низ дар ВМКБ баргузор шуда буданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
