Суди олии Тоҷикистон ба таври махфӣ парвандаҳои ҷиноятии гумонбарон ба ташкили ошӯбро дар зиндони Хуҷанд баррасӣ ва Амиралӣ Давлатовро, ки ҳукуматдорон яке аз саркардагони ошӯб медонанд, ба ҳабси якумрӣ маҳкум кард.
Ҳукм нисбати Амиралӣ Давлатов ва боз 32 нафар маҳкумшудгони дигар, ки дар ошӯб иштирок кардаанд, охири моҳи июл содир шуда, лекин аз ҷониби Суди олӣ эълон намешавад.
Дар мақомоти судӣ ба “Азия-Плюс” муяссар шуд танҳо аз ҳукм нисбати А.Давлатов огаҳӣ ёбад. Муҳлатҳои ҳукми зиндони дигар иштирокчиёни ошӯб махфӣ нигоҳ дошта мешавад.
Ҳамаи маҳкумшудагон – иштирокчиёни ошӯб дар куштор, расонидани зарари вазнини ҷисмонӣ, муқовимат ба намояндагони ҳукумат ва риоя накардани реҷаи будубош дар муассисаи ислоҳӣ айбдор дониста мешаванд.
Ҳангоми бетартибиҳо дар муассисаи ислоҳии низомаш сахти Хуҷанд, ки шаби 8 ноябри соли гузашта рух доданд, тибқи маълумоти расмӣ 21 нафар маҳбусон ҳалок шуданд. Зимни ошӯб ду корманди муассиса кушта шуда, панҷ нафар посбонон ҷароҳатҳои вазнин бардоштанд.
Амиралӣ Давлатов ба гурӯҳи ҷиноятпешаи Маханов шомил буд. Моҳи марти соли 2014 Суди олии Тоҷикистон аъзои гурӯҳи Алимурод Махановро дар терроризм гунаҳкор эътироф намуд. Роҳбари гурӯҳ Маханов ба 21 сол ва Амиралӣ Давлатов ба 19 соли зиндон маҳкум шуда буданд.
Онҳо мехостанд чаҳор дарвозаи Душанбе, бинои Вазорати умури дохилӣ ва Кумитаи амнияти миллиро битарконанд.
Тибқи маълумоти хадамоти махсус, Маханов узви фаъоли Ҳаракати исломии Ӯзбекистон ва амири ин ҳаракат дар минтақа таъин шуда буд. Худи А.Маханов ҳангоми саркӯб кардани ошӯб дар муассисаи ислоҳии №3/2 СИҶҶ дар Ваҳдат шоми 19 май кушта шуд.
Барои ташкили ошӯб ва бетартибиҳо дар муассиса 33 нафар маҳбусон ва 9 корманди муассиса, аз ҷумла сардори он ба ҷавобгарӣ ҷалб шуданд. Тавре қаблан хабар дода будем, 9 нафар кормандони муассисаи ислоҳии Хуҷанд мутобиқи моддаи 322 (Хунукназарӣ)-и Кодекси ҷиноятии Тоҷикистон гунаҳкор дониста шуда, ба муҳлатҳои аз 2,6 то 4 сол аз озодӣ маҳрум карда шуданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
