Зимни адои маросими ҳаҷ дар Арабистони Саудӣ ду шаҳрванди Тоҷикистон фавтиданд, хабар дод ба “Азия-Плюс” сухангӯи Кумитаи дин, танзими анъана ва ҷашну маросимҳои ҷумҳурӣ Афшин Муқим.
“Ҳарду зойирин аз бемории сактаи қалб ҷон бохтанд. Синни ҳардуяшон қариб ба ҳафтод расида, ҷасадҳояшон дар Макка ба хок супурда шуд”, – қайд кард ӯ.
Зимнан зикр шуд, як нафар аз ҳалокшудагон сокини шаҳри Ҳисор ва фавтидаи дигар истиқоматкунандаи ноҳияи Спитамени вилояти Суғд мебошанд.
Бино ба гуфтаи котиби матбуотии Кумитаи дин, бозгашти зойирини точик ба ватан аз 18 август шурӯъ мешавад.
Соли ҷорӣ ҳудуди 5 ҳазор нафар тоҷикистониён ба зиёрати макони муқаддаси Ислом мушарраф гардиданд. Соли 2018 беш аз 6 ҳазор нафар тоҷикистониён маросими адои ҳаҷро ба ҷо оварда буданд.
Қаблан раиси Кумитаи дин, танзими анъана ва ҷашну маросимҳо Сулаймон Давлатзода ба журналистон иттилоъ дода буд, ки имсол квотаи ҷудошуда ба Тоҷикистон барои адои маросими ҳаҷ дар макони муқаддаси ислом пур нашуд. Арабистони Саудӣ имсол ба Тоҷикистон 5 ҳазор квота ҷудо намуда, лекин на ҳамааш истифода шуд, қайд кард ӯ.
Раиси Кумита камшавии таваҷҷуҳ ба адои маросими ҳаҷро ба вазъи номусоиди иқтисодии шаҳрвандон нисбат дод.
“Баъзе хоҳишмандон худро номнавис мекунанд, вале аз иҷрои уҳдадории пардохти маблағ ё таҳияи ҳуҷҷатҳои дахлдор саривақт баромада наметавонанд. Ин асосан ба шароити иқтисодии шаҳрвандон вобаста аст”, – изҳор дошта буд Сулаймон Давлатзода.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
