Тоҷикистон аз ҳисоби фурӯши барқ ба кишварҳои ҳамсоя тӯли 8 моҳи соли ҷорӣ беш аз 76,5 млн. доллар даромад гирифт, ки нисбат ба ҳамин давраи соли гузашта 22,8% зиёдтар аст. Дар ин бора Агентии омори назди президенти ҶТ хабар медиҳад.
Қайд мешавад, ки давоми моҳҳои январ-августи соли 2018 даромад аз содироти нерӯи барқ ҳудуди 62,3 млн. сомониро ташкил дода буд.
Бино ба маълумоти Вазорати энергетика, тайи 8 моҳи соли ҷорӣ Тоҷикистон зиёда аз 2,5 млрд. кВт/соат барқ содирот кард.
Мувофиқи ҳисоботи Вазорати рушди иқтисод ва савдо “Мониторинг ва огоҳии барвақтӣ дар Тоҷикистон”, моҳи августи соли ҷорӣ ҷумҳурӣ ба ҳамсоякишварҳо 31,4% аз ҳаҷми умумии нерӯи барқи истеҳсолшударо интиқол додааст.
Ҳамин тариқ, интиқоли барқ ба Ӯзбекистон дар ҳаҷми 346 млн. кВт/соат, Афғонистон – 270 млн. кВт/соат ва Қирғизстону Қазоқистон – беш аз 22 млн. кВт/соат сурат пазируфтааст.
Аз рӯйи натиҷаҳои соли равон Тоҷикистон дар маҷмӯъ наздики 3,5 млрд. кВт/соат барқ содирот карданист.
Дар мақомоти марбута афзоиши ҳаҷми содироти барқро ба мавриди истифода қарор гирифтани ду гидроагрегати нерӯгоҳи Роғун нисбат медиҳанд, ки дар маҷмӯъ шабонарӯзӣ беш аз 6 млн. кВт/соат нерӯи барқ истеҳсол мекунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
