Чанде қабл дар гурӯҳи “Мо – Тоҷикистониён” дар Facebook модари яке аз хонандагони мактаби таҳсилоти умумии №6 шаҳри Бохтар хабар дод, ки дар ҷамъомади мактабӣ омӯзгор муйи сари чанде аз хонандагон, аз ҷумла, писари ӯро қайчӣ задааст.
“Ӯ аз мактаб омада, гиря кард ва гуфт, ки дигар ба мактаб намеравам. Агар бо писари шумо ҳамин хел муносибат кунанд, чӣ гуна рафтор мекардед?”, – пурсид ӯ.
Зери ин хабар корбарон ба ду гурӯҳ – тарафдорон, ки рафтори муаллимро номуносиб донистанд ва мухолифон, ки омӯзгорро барои “ба суханаш гӯш надодани хонандагону волидон” дастгирӣ карданд.
Сарвари мактаби №6-и шаҳри Бохтар Абӯбакр Файзализода тасдиқ кард, ки ин ҳодиса аввали моҳи октябр дар мактаб сурат пазируфтааст.
“Ман ҳам муроҷиати Саида Боеваро ба вазири маориф ва илми ҶТ дар Facebook хондам. Писари ӯ Дориюш дар синфи 4-уми мактаби мо таҳсил мекунад. Бо баҳои “хуб” ва “қаноатбахш” мехонад, лекин қоидаҳои дохилии муассисаро вайрон мекунад. Аз ҷумла, ба дарсҳо бе сарулибоси мактабӣ меояд”, – иброз дошт ӯ.
Ба гуфтаи Файзализода, волидонаш ба симои зоҳирии ӯ таваҷҷуҳ зоҳир намекунанд ва бо мӯйҳои расида ба машғулиятҳо ҳозир мешавад.
“Роҳбари синфаш чандин маротиба эрод гирифт, ки Дориюш мӯйҳояшро ба тартиб орад. Дар рӯзномааш ҳам чандин маротиба навишта шуд, то ки волидонаш аҳамият диҳанд. Мутаассифона, ҳамаи тадбирҳои аз ҷониби роҳбари синф ва муовини сарвар оид ба корҳои тарбиявӣ андешидашуда натиҷае надоданд. Роҳбари синф муовини сарвари мактаб Насрулло Қурбоновро дар ин хусус огоҳ кард. Ӯ дар навбати худ мӯйҳои Дориюшро назди гӯшҳояш каме қайчӣ зад, то ки волидонаш огоҳ шаванд”, – гуфт сарвари мактаб.
Ба қавли ӯ, масъалаи мазкур дар маҷлиси умумии омӯзгорон баррасӣ шуд.
“Мо дарк мекунем, ки нодуруст рафтор кардем. Насрулло Қурбонов муаллими ҷавону босавод аст. Аз моҳи сентябр муовини директор таъин шуд. Метавон гуфт, ки ин моҳҳои аввали кори ӯст. Ӯро ҳам фаҳмидан мумкин аст. Дар маҷлис ҳамаи муаллимон ҷиҳати роҳ надодан ба чунин ҳолатҳо огоҳонида шуданд. Аз ҷониби дигар, волидон низ уҳдадоранд, ки аввали соли хониш фарзандашонро ба мактаб омода кунанд, мӯяшро ба тартиб оранд, бо асбобу лавозимоти зарурии хониш таъмин кунанд ва ба сурати умум, қонун дар бораи масъулияти падару модаронро дар тарбияи фарзанд риоя кунанд”, – мегӯяд ӯ.
Вай афзуд, падару модарон низ бояд ба ҷараёни таҳсил ҷалб шаванд.
“Мутаассифона, аксари волидон ҳатто намепурсанд, ки чаро дар рӯзномаи фарзандашон баҳо нест, ба сатҳи дониши ӯ таваҷҷуҳе надоранд. Меоянду шикоят мекунанд, ки омӯзгорон фарзандони онҳоро барои гӯш надодан ба гапҳои муаллимону тайёр накардани дарсҳо сарзаниш мекунанд. Мо хеле хурсанд мешудем, агар волидон ба мактаб омада, дар дарсҳо иштирок, ба усули таълими омӯзгорони мо таваҷҷуҳ ва иштироки фарзандони худро дар дарсҳо назорат мекарданд. Падару модарон низ бояд дар таълиму тарбияи фарзандонашон ширкат варзанд. Мо баҳри таълиму тарбия ва донишандӯзии хонандагон ҳамаҷониба талош дорем”, – гуфт сарвари мактаб.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
