Маблағҳои пардохти ҳаққи таҳсил, ғизо, истифодаи хобгоҳ ва иҷорапулии китобҳои дарсиро масъулини муассисаи таълимии давлатӣ аз худ кардаанд.
Рӯзибоев Тоҳир Бекмуродович дар вазифаи директори Муассисаи давлатии литсей барои хонандагони болаёқат дар шаҳри Хуҷанд кор карда, тӯли солҳои 2016-2019 аз рӯйи маслиҳати пешакӣ бо сармуҳосиби муассиса Бобоқулов А.М. ва муҳосиб-хазинадор Ниёзов С.А. маблағи 842756 сомониро бо роҳи ба хазина ворид накардан тасарруф намуданд. Ин маблағро волидайни хонандагон барои таҳсил, истифодаи хобгоҳ ва иҷорапулии китобҳои дарсӣ пардохта буданд.
Дар ин бора маркази матбуоти Агентии назорати давлатии молиявӣ ва мубориза бо коррупсияи ҶТ хабар медиҳад.
Ба ҷуз ин, Тоҳир Рӯзибоев бо сармуҳосиби муассиса Бобоқулов А.М. ва мудири анбор Иброҳимов Х.А. дар давраи солҳои 2017-2019 бо сарвари ҶДММ “Файзи Музафар” Пулотов М. маслиҳати пешакӣ намуда, бо роҳи сохтакории 31 адад борхатҳои хароҷотӣ оид ба харидории молу маҳсулоти ғизоӣ 1640659 сомониро тасарруф карданд.
Дар ин асос нисбат ба Рӯзибоев Т.Б., Бобоқулов А.М. ва дигарон бо моддаҳои 245 қисми 4 банди “б” (Азонихудкунӣ ё исрофкорӣ) ва 323 (Сохтакории хизматӣ)-и КҶ ҶТ парвандаи ҷиноятӣ оғоз карда шуда, тафтиши пешакӣ идома дорад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
