Охири моҳи октябр байни "Комбинати гӯшти Слутск"-и вилояти Мински Беларус ва КВД "Истеҳсол, харид, захира ва фурӯши маҳсулоти ниёзи аввалия"-и шаҳри Душанбе дар бораи ба пойтахти Тоҷикистон таҳвил додани 300 тонна гӯшти гов шартнома ба имзо расид.
Айни замон дар доираи шартномаи баимзорасида аз Минск ба шаҳри Душанбе ҳудуди 20 тонна гӯшти гов оварда шудааст. Дар ин бора ба “Азия-Плюс” роҳбари КВД "Истеҳсол, харид, захира ва фурӯши маҳсулоти ниёзи аввалия"-и шаҳрдории Душанбе Фаррух Хушвахтов хабар дод.
“Гӯшти гови аз Беларус воридшуда бо нархи 45 сомонӣ ба нуқтаҳои хӯроки умумии Душанбе дода шуда, дар фурӯши чакана дар шабакаҳои савдо ва бозорҳои шаҳр вуҷуд надорад. Ба ин васила мо нархи ғизоро дар қаҳвахона ва ошхонаҳои шаҳр поин карданием”, – афзуд Хушвахтов.
Ба гуфтаи ӯ, барои забҳи чорво аз рӯйи шариати Ислом қассоби маҳаллӣ ба шаҳри Минск фиристода шудааст.
Хушвахтов изҳор дошт, ки дар доираи шартнома аз Беларус ба Душанбе муддати шаш моҳ гӯшти гов ворид шуда, дар зарурат муҳлати шартнома тамдид мешавад.
Барои таҳвили гӯшти гов аз Беларус ба Душанбе шаҳрдории пойтахт наздики 1 млн. доллар маблағ ҷудо кардааст.
Корхонаи Беларус, ки бо он шартнома баста шудааст, шаҳодатномаи ҳалол дошта, гӯшти худро ба Эрон ва дигар кишварҳои исломӣ содирот мекунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
