Шоири халқии Тоҷикистон Муҳаммад Ғоиб соҳиби ҷоизаи ба номи Чингиз Айтматови Ассамблеяи байнипарлумонии ИДМ шудааст.
Ӯро дар ҷаласаи панҷоҳуми раёсати Ассамблеяи мазкур, ки рӯзи 22-юми ноябр дар толори Думаи қасри Таврическийи шаҳри Санкт Петербург баргузор шуд, сазовори ин ҷоиза донистанд.
Муҳаммад Ғоиб дар суҳбат бо Asia-Plus гуфт, то ҳол аз мақомдорони расмӣ ба ӯ занг назадаанд ва худаш аз интернет соҳиби ҷоиза шуданашро фаҳмидааст.
“Ҳоло дар Бохтар ҳастам. Аз интернет фаҳмидам, ки соҳиби ҷоиза шудам. Аз мақомдорони расмӣ то ҳол маро дар ин бора огоҳ накардаанд. Маро дӯстам воқиф кард, ки номи туро дар телевизиони Русия шунидам. Баъдан аз интернет ҷустуҷӯ карда, дидам, ки соҳиби ҷоиза шудаам. Ҳама асарҳоямро ҷамъ намуда, барои иштирок дар озмуни мазкур фиристода будам. Маълум мешавад, асарҳо писандашон омадааст ва маро сазовори ҷоизаи мазкур донистаанд”, – иброз дошт Муҳаммад Ғоиб.
Вай афзуд, ки аслан барояш ҷоиза муҳим нест: “Барои шоир ва нависанда муҳим он аст, ки асарҳои ӯ тавонанд барои пешрафт ва тафаккури ҷомеа таъсире расонида бошанд. Хушбахтона, осор ва ашъори ман бетаъсир набудаанд, ки онро берун аз кишвар эътироф карданд. Пас аз гирифтани маблағи ҷоиза нақша дорам, шеър ва китобҳои худро ба забони русӣ тарҷума ва нашр кунам. Инчунин ду-се филмнома навиштаам, ки аз моҳи январ ба сабти онҳо шурӯъ мекунанд”.
Ҷоизаи ӯро ба раиси Маҷлиси Миллии Маҷлиси Олии ҶТ Маҳмадсаид Убайдуллоев супориданд, ки ба раёсати Ассамблея барои шарафёб гардонидани Муҳаммад Ғоиб изҳори сипос кард.
Қобили зикр аст, ки ҷоизаи ба номи Чингиз Айтматов соли 2012 таъсис ёфтааст ва он ба намояндагони шинохтаи адабиёту фарҳанги Иттиҳоди давлатҳои мустақил тақдим мешавад. Маблағи ҷоизаи мазкур 30 ҳазор доллари амрикоиро ташкил медиҳад.
ИЗОБРАЖЕНИЕ
Муҳаммад Ғоиб 16-уми марти соли 1954 таввалуд шудааст. Хатмкардаи Донишкадаи давлатии омӯзгории шаҳри Кӯлоб аст. Аз соли 1977 ба ҳайси мухбири Кумитаи телевизион ва радио дар минтақаи Кӯлоб фаъолият карда, аз соли 1987 то соли 1990 мухбири ҳафтаномаи «Адабиёт ва санъат» дар ин минтақа буд. Ӯ солҳои 1990-1995 раиси Кумитаи давлатии телевизион ва радиои собиқ вилояти Кӯлоб ва 1995-1997 роҳбари қароргоҳи ҳукуматии вилояти Хатлон дар минтақаи Кӯлоб буд. Инчунин солҳои 1997-2000 раиси Кумитаи телевизион ва радиои вилояти Хатлон, аз соли 2000 то 2004 муовини раиси Кумитаи телевизион ва радиои назди ҳукумати Ҷумҳурии Тоҷикистон буд. Соли 2004 сарвари Киностудияи “Тоҷикфилм” таъин шуда, онро то соли 2008 роҳбарӣ кардааст. Аз соли 2008 то 2012 сарвари Шабакаи якуми телевизиони Тоҷикистон буд. Аз соли 2012 то вақти нафақа сардабири рӯзномаи “Ҷумҳурият” буд.
Ӯ дорандаи ордени “Шараф”, унвони Шоири халқии Тоҷикистон, Ҷоизаи давлатии Тоҷикистон ба номи Абӯабдуллоҳ Рӯдакӣ, медали ҷашнии “100-солагии матбуоти тоҷик” ва барандаи ҷоизаи ба номи Шамсиддини Шоҳин мебошад.
Номбурда зиёда аз 50 асар, аз ҷумла, “Турнаҳо”, “Роҳи деҳа”, “Меҳри гиёҳ”, “Тоҷикистон Ватани Наврӯз аст”, “Шоҳи Ҳамадон” эҷод кардааст. Ӯ муаллифи филмномаҳои “Гумгаштапайдо”, “Пуштаи хандақпеч”, “Ҳасрати дидор”, “Вафодор” ва ғайра мебошад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
