Дар робита ба фарорасии фасли сармо ва бо мақсади таъмини талаботи дохилии кишвар содироти нерӯи барқ аз Тоҷикистон ба Ӯзбекистон қатъ шуд.
Тавре як манбаи огаҳ аз ҳукумати Тоҷикистон ба “Азия-Плюс” хабар дод, мувофиқи созишҳои қаблан ҳосилшуда, Душанбе танҳо дар давраи аз моҳи апрел то октябр, вақте ки талаботи дохилии Тоҷикистон пурра таъмин аст, ба Ӯзбекистон барқ интиқол медиҳад.
Давоми моҳои январ-сентябри соли равон Тоҷикистон ба Ӯзбекистон ҳудуди 1,5 млрд. кВт/соат нерӯи барқ содирот кард.
Аз моҳи сентябр содироти барқ ба ҳамсоякишвар коҳиш ёфта, нимаи моҳи ноябр Тоҷикистон интиқоли онро ба Ӯзбекистон комилан қатъ кард. Аввали моҳи апрели соли оянда содироти барқ дубора шурӯъ мешавад.
Дар ҳамин ҳол, тибқи маълумоти манбаъ, айни замон интиқоли барқ аз Тоҷикистон ба Афғонистон то ҳадди камтарин поин бурда шудааст.
Агар моҳи август ба Афғонистон шабонарӯзӣ ба ҳисоби миёна 10 млн. кВт/соат нерӯи барқ интиқол дода мешуд, имрӯз ин рақам то ҳудуди 750-800 ҳазор кВт/соат коҳиш ёфтааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
