Бонки ҷаҳонӣ ба ҳукумати Тоҷикистон тавсия додааст, ки барои бартараф кардани оқибати офатҳои табиӣ дар фонди махсуси захиравӣ маблағ пасандоз кунад.
“Беш аз 60%-и аҳолии Тоҷикистон дар минтақаҳои аз лиҳози заминҷунбӣ хатарнок зиндагӣ мекунанд. Аз ин рӯ, офатҳои табиӣ ба суботи иқтисодӣ ва молиявӣ хатари ҷиддӣ эҷод мекунанд”, – қайд мешавад дар гузориши Бонки ҷаҳонӣ таҳти унвони “Баланд шудани хавфҳои молиявӣ дар Тоҷикистон”.
Бо такя ба маълумоти Барномаи рушди СММ зикр мегардад, ки танҳо обхезӣ ва селҳои соли 2015 ба Тоҷикистон дар ҳаҷми 100 млн. доллар зиён оварданд.
Муаллифони гузориш аз эҳтимол дур намедонанд, ки хатарҳои марбут ба аҳолӣ уҳдадориҳои имконпазири давлатро ҳам ба миён мегузоранд.
“Бо вуҷуди аз ҷониби ҳукумат таъсис дода шудани як қатор фондҳо, воқеан онҳо бо захираҳои кофӣ барои рӯйпӯш кардани хароҷоти кишвар аз офатҳои табиӣ таъмин нашуда буданд”, – таъкид мекунанд онҳо.
Дар гузориш гуфта мешавад, имконоти молиявии ҳукумат дар мавриди рафъи ин оқибатҳо хеле маҳдуд аст.
Сарфи назар аз ин, таъкид мекунанд коршиносони Бонки ҷаҳонӣ, тадбирҳои баланд бардоштани сатҳи омодагӣ ба офатҳои табиӣ аз нуқтаи назари молиявӣ андешида мешаванд.
Бонки ҷаҳонӣ тавсия медиҳад, ки барои сабуктар сохтани оқибати офатҳои табиӣ минбаъд низ талош варзида шавад. Аз ҷумла, ҷамъоварии маблағ дар фонди захиравӣ, ки барои вокуниши фаврӣ ба офатҳои табиӣ ва рафъи пайомади онҳо пешбинӣ мешавад.
Ҳамчунин ҷорӣ кардани механизмҳои мукаммали суғурта ва мунтазам ҷамъоварии маълумот дар бораи хароҷоти вобаста ба офатҳо тавсия шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
