Дар шаҳри Хоруғ машқҳои амалию тактикии воҳидҳои таъиноти махсуси Раёсати ВКД дар Вилояти Мухтори Кӯҳистони Бадахшон гузаронида шуд.
Он бахшида ба рӯзи таъсисёбии Воҳидҳои таъиноти махсуси ВКД ҶТ ҷараён гирифта, мақсад аз баргузорияш баланд бардоштани маҳорати касбии ҳайати шахсӣ будааст.
Тибқи иттилои ВКД, зимнан марҳилаҳои гуногуни машқҳои амалию тактикӣ нишон дода шуд. Аз ҷумла, ҳайати шахсии воҳидҳои таъиноти махсуси РВКД дар ВМКБ гӯё пешгирӣ кардани бетартибиҳои оммавӣ, безараргардонии гурӯҳҳои террористони силоҳбадаст, нишон додани машқҳои амалӣ дар шароити кӯҳсор, дастгир намудани гурӯҳи нашъаҷалобон, ки дар маҳалли аҳолинишин ҷой гирифта, бо худ ғайриқонунӣ маводи мухаддир ва яроқҳои оташфишон нигоҳ медоштанд, инчунин аз гурӯҳҳои террористӣ озод намудани шахсони гаравгон ва машқҳои ҳарбиро бо маҳорати баланд иҷро кардаанд.
Дар идомаи хабар гуфта мешавад, ки воҳидҳои таъиноти махсус аз ҷойҳои мушкилгузар ва пайраҳаҳои кӯҳӣ ба баландии 3 ҳазор метр аз сатҳи баҳр дар муддати кӯтоҳ баромада, зери парчами кишвар Суруди миллии Тоҷикистонро суруданд.
Муовини якуми вазири корҳои дохилӣ, сардори РВКД дар ВМКБ Абураҳмон Аламшозода аз натиҷаи гузаронидани машқҳои амалӣ-тактикӣ изҳори қаноатмандӣ карда, ба роҳбарони воҳидҳои таъиноти махсуси РВКД дар ВМКБ барои беҳтар ташкил намудани чунин машқҳои амалию тактикӣ супоришҳои мушаххас додааст.
“Воҳидҳои таъиноти махсуси РВКД дар ВМКБ дар оянда низ намунаи садоқат ба савганди ҳарбӣ ва хизмати фидокорона ба Ватан буда, дар сафи пеши мубориза бо ҷинояткорӣ ва ҳифзи ҳуқуқу манфиатҳои шаҳрвандон, таъмини сулҳу субот ва волоияти қонун қарор хоҳанд дошт”, – омадааст дар хабари ВКД.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
