Патенти ҳуқуқи кор барои шаҳрвандони хориҷӣ дар қаламрави Маскав соли 2020 ба миқдори 350 рубл гаронтар шуд.
Хабаргузории Interfax иттилоъ медиҳад, ки соли 2020 кормандони хориҷӣ барои гирифтани патент ба ҷойи 5000 рубли соли 2019 акнун 5350 рубл мепардозанд. Соли 2018 нархи ин ҳуҷҷат ба 4500 рубл баробар буд.
Қобили зикр аст, ки аз соли 2015 шаҳрвандони Украина, Молдова, Озарбойҷон, Тоҷикистон ва Ӯзбекистон барои кор дар қаламрави Маскав патент дастрас мекунанд.
Тибқи арзёбии пешакии департаменти сиёсати иқтисодӣ ва рушди шаҳрдории Маскав, соли 2019 воридоти маблағ ба буҷет дар шакли андоз аз даромади шахсони воқеӣ барои гирифтани патент аз шаҳрвандони хориҷӣ 18 млрд. рублро ташкил додааст. То нимаи моҳи декабр 427 ҳазор нафар ин гуна ҳуҷҷат гирифтаанд.
Шаҳрдори Маскав Сергей Собянин муътақид аст, ҳама гуна муҳоҷири корие, ки барои кор ба пойтахти Русия меояд, бояд маблағи андоз бипардозад.
“Хизматрасонии муҳоҷирон барои корфармо набояд аз фаъолияти шаҳрвандони Русия арзонтар бошад. Ин мавқеи усулии муҳим аст. Мо бояд ба он ноил шавем, ки ҳама шахсони ба Маскав барои кор меомада худро ба қайд гузошта, мисли маскавиҳо андоз пардохт кунанд”, – гуфтааст Собянин дар машварати умумишаҳрӣ оид ба пешгирии қонуншиканиҳо.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
