Аз намуди нави коронавируси 2019-nCoV дар Чин то имрӯз 26 кас фавтида, беш аз 830 нафар гирифтори он шудаанд. Ҳукумати Чин ниҳоятан вуруд ва хориҷшавии шаҳрвандонро дар шаҳри Ухан, ки маҳалли пайдоиши ин беморист, маҳдуд кардааст.
Мақомоти тоҷик дархост карданд, ки сафари шаҳрвандони Тоҷикистон ба Чин маҳдуд карда шавад. Дар ин бора муовини вазири тандурустӣ ва ҳифзи иҷтимоии аҳолии ҶТ Мирҳамуддин Камолзода рӯзи сешанбе, 21-уми январ ба хабарнигорон иттилоъ дод.
“Вазорати тандурустӣ ва ҳифзи иҷтимоии аҳолӣ ҳамчун мақоми ваколатдор ба унвонии Вазорати корҳои хориҷии Тоҷикистон ва Кумитаи рушди сайёҳии назди Ҳукумати ҶТ мактуб ирсол кардааст, ки то муътадил шудани вазъият сафарҳои шаҳрвандон ба Чин маҳдуд гардонида шавад”, – гуфт Камолзода.
Дар пайи тасмимҳои вазорати тандурустӣ фаъолияти нуқтаҳои санитарӣ-карантинӣ дар гузаргоҳҳои сарҳадии заминӣ ва фурудгоҳҳои кишвар пурзӯр ва ташхиси мусофирон ҷиддӣ шудааст. Ҳамзамон ширкатҳои ҳавопаймоии Тоҷикистон ва Чин нисфирӯзии 23-юми январ аз қатъи тамоми парвозҳо байни ду кишвар то моҳи феврали соли ҷорӣ хабар доданд. Гуфта мешавад, ки ин тасмим ба оғози соли нави чинӣ рабт дорад. Ин ҷашн имсол ба 25-уми январ рост меояд ва зиёда аз як ҳафта тӯл мекашад. Дар арафаи он хитоиҳои тамоми ҷаҳон ба ватан ва пеши наздиконашон бармегарданд.
Дар пайи хабарҳои изтиробангези асонаҳо ва шабакаҳои иҷтимоӣ қисме аз сокинони Тоҷикистон низ ба хариди ниқоби тиббӣ ва доруҳои зидди зуком шурӯъ кардаанд.
Бахтовар Мунавваровро дар яке аз дорухонаҳои маркази шаҳри Душанбе дар ҳоли хариди ниқоби тиббӣ ва доруи зидди зуком дарёфтем. Ӯ бовар дорад: “Ин ниқоб аз вирусҳо ва дигар бемориҳои нав муҳофизат мекунад”.
Бахтовар афзуд: “Ҳоло як навъ зуком омадааст ва ростӣ, хонаводаи мо ҳамагӣ ба он гирифторанд. Ҳамин ҳоло ба дорухона барои харидани дору омадам”.
Ҳамзамон дар дорухонаҳо аз зиёд шудани талабот ба ниқоби тиббӣ ва дорувории зидди зуком иттилоъ медиҳанд. Фурӯшандаи яке аз дорухонаҳои маркази пойтахт Шукруллоҳ Бурҳонов инро тасдиқ кард.
“Ҳафтаи ахир талабот ба ниқобҳои тиббӣ зиёд шудааст. Ин аз ҳисоби зуком аст ё вирус, намедонам, вале мардум ниқобакҳоро зиёд мехаранд”, – гуфт доруфурӯш.
Афзоиши талабот ба ниқобҳои тиббӣ дар ҳолест, ки мавсими бемориҳои роҳи нафас дар кишвар идома дорад.
Мутахассисон мегӯянд, эҳтимоли паҳншавии вирус аз тариқи маҳсулоти гӯштӣ ба Тоҷикистон таҳдид намекунад. Харидуфурӯш дар бозорҳои Тоҷикистон, ки пур аз маҳсулоти чинӣ аст, чун ҳамеша дар авҷ. Ҳарчанд Тоҷикистон аз Чин маҳсулоти гӯштӣ ворид намекунад, ҳамоно аз эҳтиёт кор гирифтан тавсия мешавад.
Ба иттилои вазорати тандурустӣ ва ҳифзи иҷтимоии аҳолии ҶТ, то кунун ҳолати сироят ба коронавирус дар Тоҷикистон ба қайд гирифта нашудааст.
Коронавируси 2019-nCoV ангезандаи нав ва то ҳол барои табибон номаълум аст, ки ба гуфтаи мутахассисон, дар ҳайвоноти хонагӣ пайдо ва инкишоф ёфта, қобилияти мутобиқшавию сироят ба инсонро дорад. Мавзеи хуруҷи он шаҳри Ухани Чин буда, ҳолатҳои гирифторӣ ба ин беморӣ дар Куриёи Ҷанубӣ, Ҷопон, Тайланд, Сингапур ва ИМА мушоҳида шудааст.
Вазорати тандурустӣ ва ҳифзи иҷтимоии аҳолии Тоҷикистон шаҳрвандонро ба эҳтиёткорӣ ва риояи қоидаҳои беҳдоштӣ даъват мекунад.
“Худдорӣ аз рафтан ба ҷойҳои ҷамъи одамон, хусусан, бозор ва маконҳое, ки шахсони гирифтори бемориҳои роҳи нафас зиёданд, тавсия мешавад. Мунтазам шустани дастон бо собун ва ё маҳлулҳои безараргардонанда лозим аст. Даст нарасондан ба паҳлӯҳои луобӣ, хусусан, ба биниву чашму даҳон ва тез-тез шамол додани манзили зист, истифодаи бештари меваҷоту сабзавот, ки дар таркиби онҳо витамини С зиёд асту масунияти одамро баланд мегардонад, инчунин сайру гашт дар ҳавои кушод аз манфиат холӣ нест”, – иброз дошт Мирҳамуддин Камолзода.
Хабари паҳншавии ин беморӣ нигарониҳои зиёдро дар аксари кишварҳои ҷаҳон ба бор овардааст. Созмони ҷаҳонии тандурустӣ хушдор додааст, кишварҳо ба хуруҷи коронавирус омода бошанд, аммо аз эълони вазъияти фавқулода дар саросари ҷаҳон то ҳол худдорӣ кардааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
