Бар асари коронавирус аксари ширкатҳои ҳавопаймоӣ парвози тайёраҳоро бо хатсайрҳо қатъ ё шумори онҳоро кам мекунанд.
«Сомон Эйр»
Аз ин ширкат ба “Азия-Плюс” хабар доданд: “Маҷбурем, шумори хатсайрҳоро ба самти шаҳрҳои Русия кам кунем, аммо кӯшиш ба харҷ хоҳем дод, ки бо назардошти теъдоди мусофирон парвоз дар хатсайрҳоро анҷом диҳем”.
Мувофиқи лавҳаи вақти воқеӣ (онлайн-табло)-и Фурудгоҳи байнулмилалии Душанбе, “Сомон-Эйр” имрӯз парвозҳоро аз Душанбе ба шаҳрҳои Маскав (Жуковский) ва Новосибирск (Томачёво) бекор кардааст.
Тавре ба “Азия-Плюс” аз ин ширкати ҳавопаймоӣ хабар доданд, дар давраи аз 18 то 22 март иҷрои парвозҳо бо чунин хатсайрҳо дар назар аст:
18 март – Душанбе-Маскав-Душанбе, Хуҷанд-Душанбе-Хуҷанд
19 март – Душанбе-Маскав-Душанбе, Хуҷанд-Душанбе
20 март – Истанбул-Душанбе-Истанбул, Душанбе-Хуҷанд-Душанбе
21 март – Душанбе-Хуҷанд-Душанбе
22 март – Душанбе-Хуҷанд-Душанбе.
Тибқи қарори ҳукумати Русия, ба парвоз танҳо шаҳрвандони Русия ва ҳамчунин категорияи муайяни шахсоне роҳ дода мешаванд, ки дар қарор зикр шудаанд ва ин ба ҳамаи ширкатҳо дахл дорад.
Ёдрас мекунем, ки “Сомон Эйр” қаблан парвозҳоро ба Ҳиндустон, Олмон, Амороти Муттаҳидаи Араб қатъ карда буд.
Turkish Airlines
Дар ширкат хабар доданд, ки парвозҳои наздиктарин бо хатсайри Душанбе-Истанбул рӯзҳои 19, 21 ва 26 март анҷом дода мешаванд.
“Кам шудан ё қатъ шудани парвозҳо дар ҳафтаи оянда алҳол номаълум аст”, – қайд карданд дар Turkish Airlines.
Қаблан ин ширкат парвозҳоро бо хатсайри Истанбул-Душанбе то ду маротиба кам карда буд.
Fly Dubai
Аз ин ширкат иттилоъ доданд, ки парвози наздиктарин бо хатсайри Душанбе-Дубай рӯзи 20-уми март сурат мепазирад.
Алҳол қатъ шудани парвозҳо ба ин самт номаълум аст. Ин ширкат низ қаблан парвозҳоро ба Душанбе то ду маротиба кам кард.
«Эйр Астана»
Тавре аз ширкат хабар доданд, парвозҳои наздиктарин бо хатсайри Душанбе-Алмаато рӯзҳои 20 ва 25 март иҷро мешаванд. «Эйр Астана» пештар парвозҳоро ба ин самт аз 6 то 2 маротиба дар як ҳафта кам кард.
«ЮтЭйр»
Ширкат дар як рӯз бо хатсайри Маскав (Внуково)-Душанбе 2 парвоз анҷом медиҳад. Зикр шуд, ки субҳи имрӯз ҳавопаймо бо ин хатсайр парвоз карда, хатсайри бегоҳӣ бекор карда шудааст.
Фардо парвозҳо бо хатсайр тибқи ҷадвал анҷом дода мешаванд. Аммо тибқи ҷадвал сурат пазируфтани парвозҳо дар рӯзҳои дигар номаълум аст.
«Уральские авиалинии»
Ширкат имрӯз, 18-уми март чаҳор парвозро аз Душанбе ба самти шаҳрҳои Санкт-Петербург, Краснодар, Екатеринбург, Маскав (Жуковский) бекор кард.
Дар ширкат ба “Азия-Плюс” дар бораи тағйирот ба ҷадвали парвозҳо маълумот надоданд.
“Дар ин бора ба ВАО маълумот намедиҳем. Огаҳ кардани мусофирон дар бораи бекор шудани парвоз мушкили худи мост”, – гуфтанд дар ширкат.
Дар ҳамаи ширкатҳои ҳавопаймоӣ изҳор доштанд, ки маблағҳои сарфкардаи мусофирон барои билет аз ҷойи харидорӣ пурра баргардонида мешаванд ё метавонанд ба вақти дигар гузаронида шаванд.
Қобили зикр аст, ки пештар Тоҷикистон бо Чин, Эрон ва Афғонистон иртиботи ҳавоиро қатъ кард. Ҳамчунин парвозҳо байни Тошканду Душанбе низ боздошта шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
