Се парвози ҳавопаймоҳои чартерӣ танҳо барои баргардонидани шаҳрвандони Русия аз Тоҷикистон ва дигар кишварҳо ташкил карда мешавад. Дар ин бора сафорати Тоҷикистон дар Русия хабар додааст.
Сафорат аз ҳамаи ҳамватанон хоҳиш кардааст, ки ба маълумоти шубҳанок ва носанҷида бовар накунанд.
“Ҳамчунин дар сурати пешниҳоди фурӯши билети ҳавопаймо аз ҷониби шахсони алоҳида, аз харидории чунин билетҳои ҳавопаймо худдорӣ намоед. Ҳангоми барқарор шудани парвози ҳавопаймоҳо ба самти Тоҷикистон, шаҳрвандон метавонанд маълумотро танҳо аз сайтҳои расмии ширкатҳои ҳавопаймоӣ, сафорат ва консулгариҳои генералии Тоҷикистон дар Русия, инчунин дигар мақомоти расмии Тоҷикистон дарёфт намоянд”, – таъкид шудааст дар маълумоти саҳифаи сафорат дар Facebook.
Зимнан аз шаҳрвандони Тоҷикистон ва ҳамватанон хоҳиш мешавад, ки дар сурати ба миён омадани суолҳо ва масъалаҳои ҳалталаб, бевосита, ҳар як шахс худаш, тавассути телефонҳои доимӣ амалкунандаи сафорат ва консулгариҳои генералии Тоҷикистон муроҷиат намоянд.
Дар ҳамин ҳол, маълум кардани он, ки оё бо ин хатсайрҳо аз Русия ба Тоҷикистон кумаки башардӯстона ё ягон чизи дигар оварда мешавад ё на, муяссар нашуд. Дар Фурудгоҳи байнулмилалии Душанбе хабар доданд, ки вақти дақиқи омадани ҳавопаймоҳо ва чӣ овардани онҳо ба Тоҷикистон алҳол маълум нест.
Рӯзи 28-уми апрел Росавиатсия то рӯзи 5-уми май ҷадвали пешакии парвози ҳавопаймоҳоро аз кишварҳои хориҷа барои баровардани шаҳрвандонаш пешниҳод кард.
Аз ҷумла, рӯзи 30-юми апрел ду парвоз аз пойтахти Тоҷикистон пешбинӣ шудааст. Ширкати “Сибирь” аз Душанбе ба Новосибирск ва ширкати «Уральские авиалинии» аз Душанбе ба шаҳрҳои Сургут ва Екатеринбург парвозҳо анҷом медиҳанд.
Рӯзи 3-юми май парвози ҳавопаймои ширкати «Уральские авиалинии» аз Душанбе ба Маскав барои баровардани шаҳрвандони Русия дар назар аст.
Қобили зикр аст, ки Тоҷикистон аз 20-уми март иртиботи ҳавоии байнулмилалиро ба ҳама самтҳо қатъ кард.
Русия бар асари хуруҷи коронавирус аз 27-уми март иртиботи мунтазами ҳавоиро бо кишварҳои дигар қатъ кард. Танҳо аз хориҷа баровардани сайёҳони русиягӣ истисност. Аз 31-юми март шумори хатсайрҳо барои аз хориҷа баргардонидани шаҳрвандон кам шуда, шумори мусофирон маҳдуд шуд. Аз аввали моҳи апрел якчанд рӯз баргардонидани шаҳрвандон қатъ гардида, аз 6-уми апрел ин гуна парвозҳо барқарор шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
