Соли равон ба сохтмони неругоҳи Роғун аз ҳисоби буҷет 2,1 млрд сомонӣ ҷудо шуда, то ин дам 1,3 млрд сомонӣ аз ин маблағ азхуд шудааст.
Вазири молияи Тоҷикистон Файзиддин Қаҳҳорзода зимни нишасти матбуотӣ дар ин робита изҳор дошт, ки маблағгузорӣ ба нерӯгоҳ бо назардошти нақшаи пешбинишуда сурат мегирад.
“Ба сохтмони неругоҳи Роғун тадриҷан ва давра ба давра ҳар моҳ пул ҷудо мекунем”, – иброз дошт вазир.
Охири моҳи январи соли ҷорӣ директори генералии ҶСК “НБО Роғун” Хайрулло Сафарзода ба аъзои палатаи болоии парлумони ҷумҳурӣ хабар дод, ки Ҷамъият назди ширкатҳои паймонкор, молрасон ва хизматрасони ватаниву хориҷӣ беш аз 1 млрд сомонӣ (наздики 100 млн доллар) қарздор аст.
Мувофиқи маълумоти расмӣ, аз оғози бунёди нерӯгоҳи Роғун аз ҳамаи сарчашмаҳои маблағгузорӣ 28 млрд сомонӣ азхуд шудааст.
Ёдрас мекунем, ки агрегати аввали нерӯгоҳи Роғун моҳи ноябри соли 2018 ва агрегати дуюм – моҳи сентябри соли 2019 ба истифода дода шуд.
Дар нерӯгоҳ насби 6 агрегати иқтидори ҳар кадоме 600 МВт ба нақша гирифта шудааст. Пас аз анҷоми сохтмони нерӯгоҳ иқтидори он 3 ҳазору 600 МВт-ро ташкил хоҳад дод, ки бузургтарин нерӯгоҳи барқи обӣ дар Осиёи Миёна аст.
Сарбанди 335-метрии гиливу хокии нерӯгоҳ баландтарин дар ҷаҳон хоҳад буд. Иншоот ҳамасола 17 млрд. кВт/соат қувваи барқ истеҳсол хоҳад кард, ки дар муқоиса бо иқтидори нерӯгоҳи Норак якуним баробар зиёд аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
