Дар бораи ин масъала ва дигар паҳлӯҳои таҳсили донишҷӯёни тоҷик сафири Русия дар Тоҷикистон Игор Лякин-Фролов ба “Азия-Плюс” изҳори назар кард.
Ба гуфтаи ӯ, айни замон ҳукумати Русия масъалаи васеъ кардани категорияҳои шаҳрвандони хориҷиро, ки дар шароити маҳдудиятҳои ҷорӣ вобаста ба пандемияи коронавирус ҳуқуқи вуруд ба Русияро доранд, баррасӣ дорад ва дар назар аст, ки донишҷӯёни хориҷӣ низ ба ин категория дохил карда шаванд.
“Агар ба қарори ҳукумат аз 16 март доир ба вуруди шаҳрвандони хориҷӣ ба Русия барои таҳсил илова ворид шавад, ташкили хатсайрҳои ҳавоии чартерӣ имкон дорад, – гуфт сафир. – Дар ҳамин ҳол ҷараёни вазъи санитарӣ-эпидемиологӣ дар ҳар ду кишвар ба инобат гирифта мешавад”.
Игор Лякин Фролов дар мавриди ин масъала ҳамчунин изҳор дошт, ки Вазорати маориф ва маълумоти олии Русия ба мактабҳои олӣ дастур додааст, ки баргузории машғулиятҳоро тариқи онлайн низ роҳандозӣ намоянд.
“Донишҷӯёни хориҷие, ки 1 сентябр ба дарс ҳозир мешаванду маҷбуранд, ки аз карантини дуҳафтаина дар хобгоҳҳо гузаранд, низ бо таҳсили фосилавӣ (онлайн) фаро гирифта мешаванд”, – қайд кард ӯ.
Дар робита ба шумори донишҷӯёни тоҷикистонӣ, ки имсол ба мактабҳои олии Русия дохил шудаанд, сафир зикр кард, ки дар доираи квотаи ҳукумати Русия имсол 630 нафар ба мактабҳои олии Русия қабул шуда, инчунин муассисаҳо довталабонро тариқи онлайн бо ёрии шарикони тоҷикистонии худ низ ба таҳсил қабул мекунанд
“Маъракаи қабул ба мактабҳои олии Русия идома дошта, аз ин рӯ, натиҷагирӣ аз он ва пешниҳоди маълумоти саҳеҳ дар бораи шумори донишҷӯёни имсолаи тоҷикистонӣ дар Русия ҳоло барвақт аст”, – иброз дошт дипломат.
Зикр шуд, ки солҳои пешин наздики 4,5 ҳазор нафар донишҷӯёни тҷик ҳамасола ба мактабҳои олии Русия дохил мешуданд, лекин имсол бо сабабҳои маълум шумори донишҷӯёни аз Тоҷикистон қабулшуда шояд камтар шавад.
… Дар ҳамин ҳол, бино ба маълуомти мақомоти марбутаи Русия, аз 21 август то 1 сентябр аз Тоҷикистон ба Русия 25 парвозӣ чартерӣ анҷом дода мешавад. Иҷрои парвозҳо ба шаҳрҳои Санкт-Петербург, Маскав, Краснодар, Қазон, Сургут ва Екатеринбург дар назар аст.
Гуфта мешавад, бо гузоштани қайд дар Портали хизматрасониҳои давлатӣ шаҳрвандон метавонанд ба ин хатсайрҳо билет дастрас кунанд. Маълумот дар ин хусус дар дастурамали муфассали сомонаи сафорати Русия қобили дарёфт аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
