Бо мақсади пешгирӣ аз густариши коронавирус COVID-19 ва дар доираи татбиқи ҳамкориҳои дуҷонибаи байналмилалӣ дар самти бартарафсозии оқибатҳои ҳолатҳои фавқулода рӯзи 19 сентябри соли 2020 дар Кумитаи ҳолатҳои фавқулодда ва мудофиаи граждании назди ҳукумати Тоҷикистон маросими таҳвили доруҳо ва таҷҳизоти тиббӣ барои муолиҷаи коронавирус, ки Бахши Агентии Оғохон оид ба Зистгоҳ дар Ҷумҳурии Тоҷикистон харидорӣ кардааст, баргузор шуд.
Бино ба иттилои маркази матбуоти КҲФ, дар ин маросим Раиси КҲФ генерал-лейтенант Рустам Назарзода ва Сарвари Бахши Агентии Оғохон оид ба Зистгоҳ дар Ҷумҳурии Тоҷикистон ҷаноби Ҳодӣ Ҳусайнӣ ширкат карданд.
Гуфта мешавад, дар қатори кумакҳо доруҳо ва лавозимоте чун корҷомаҳои махсуси бисёркарата, мӯзаҳои резинӣ, айнакҳои ҳифозатӣ, ниқобҳо, сӯзандоруҳо, дастпӯшҳо, дастгоҳҳои набзсанҷӣ, ҳароратсанҷҳои электронии фосилавӣ, антисептикҳо, воситаҳои уфунатзудоӣ, ки барои мубориза бо КОВИД-19 самароварданд, дохил мешуданд.
“Ҳамаи доруҳо ва лавозимоти тиббии таҳвилшуда барои табобати ҳайати шахсии Кумита дар сурати мубтало ба ин беморӣ шуданашон истифода мешавад, – омадааст дар хабар. – Илова бар ин Агентӣ як мошини тамғаи “Ниссан”-ро, ки мутааллиқ ба КҲФ буд, пурра таъмир кард ва ба ихтиёри Кумита гузошт”.
Раиси КҲФ генерал-лейтенант Рустам Назарзода дар маросими таҳвили васоили тиббӣ ба сарвари Агентии Оғохон оид ба Зистгоҳ изҳори сипос кард ва гуфт, ки ёрие, ки имрӯз расид, ба пешгирӣ аз густариши коронавирус COVID-19 дар Тоҷикистон равона шудааст ва бидуни шак ин як кумаки арзишмандест, ки ба фаъолиятҳои мо таъсир хоҳад дошт.
Дар навбати худ ҷаноби Ҳодӣ Ҳусайнӣ зикр намуд, ки Агентии Оғохон оид ба Зистгоҳ дар оянда низ аз талошҳои Ҳукумати Ҷумҳурии Тоҷикистон дар пешгирӣ аз густариши коронавирус COVID-19 пуштибонӣ мекунад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
