Ӯктами Холиқназар, нависанда, тарҷумон ва донишманди пуровозаи риштаи забон, имрӯз дар синни 80-солагӣ аз олам даргузашт.
Гуфта мешавад маросими ҷанозаи ӯ фардо дар Душанбе баргузор мешавад.
Ӯктами Холиқназар яке аз равшанфикрони фаъоли охири солҳои 80-уми ва оғози солҳои 90-ум буд, ки нақши барозанде дар талошҳо барои мақоми давлати гирифтани забони тоҷикӣ дошт. Ин донишманди фақид узви садорати созмони маъруфи "Растохез" буд. Ӯ дар оғози солҳои 2000 китоби маъруфи худ "Ғалат менависем"-ро нашр кард, ки ҳангомаҳое дар матбуоти он замон ба вуҷуд овард.
Баъдан Ӯктами Холиқназар дар матбуот ба чигунагии забони бархе осори илмиву адабӣ пардохт ва сари чанд вақт мақолаҳое ба нашр мерасонд.
Ӯктами Холиқназар дар баробари ин нависандаи чирадаст ва тарҷумони бархе аз осори адибони маъруфи дунё буд. Ӯ китоби "Мартин Иден"-и нависандаи маъруфи амрикоӣ Ҷек Лондонро ба тоҷикӣ тарҷум карда буд, ки яке аз тарҷумаҳои муваффақи адабӣ эътироф шуда буд. "Рӯзноманигори озод" ҳам яке аз китобҳои дигари ин нависандаи маъруф буд.
Ӯктами Холиқназар бо мавзуеъгириҳои бисёр қотеъи худ ҳам дар муҳити адабӣ ва фарҳангии Тоҷикистон маъруф буд. Аз ҷумла ӯ соли 2005 бо навиштани як мақолаи дусаҳфаӣ дар нашрияи "Миллат" гуфт аз узвияти Иттиҳодияи Нависандагони Тоҷикистон берун меравад.
Ӯктами Холиқназар моҳи октябри соли гузашта ба сини 80 расида буд.
Раҳбарӣ ва аҳли эҷоди гуруҳи расонаҳои "Азия-Плюс" аз марги ин донишманди варзида ва нависандаи маъруф андӯҳгин буда, ба пайвандону наздиконашон дар ин мусибати азим сабру шикебойӣ мехоҳанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
