Қарзи кредитории корхонаву ташкилотҳои ҳисоботдиҳандаи Тоҷикистон ба ҳолати 1 январи соли равон ба ҳудуди 88,3 млрд сомонӣ (7,8 млрд доллар) расид, хабар медиҳад Агентии омори назди президенти Тоҷикистон.
То аввали соли 2020 қарзи умумии корхонаву ташкилотҳои кишвар 66,3 млрд сомониро ташкил медод.
Ба ин тариқ, қарзи ташкилоту корхонаҳо дар соли 2020 ба андозаи 33% ё худ 22 млрд сомонӣ (қариб 2 млрд доллар) афзуд.
Ҳаҷми афзоиши Маҷмӯи маҳсулоти дохилӣ (ММД)-и ҷумҳурӣ дар соли гузашта 4,5% – то 82,5 млрд сомонӣ (7,3 млрд доллар)-ро ташкил дод.
Ҳиссаи ташкилоту корхонаҳои зиёновар ба ҳолати 1 январи соли ҷорӣ ба 25,5% расида, ин корхонаҳо асосан дар соҳаи саноати коркард, инчунин сохтмону нақлиёт ва бахши алоқа фаъолият доштанд.
Корхонаҳои зиёновар бо шумули ШСКХ “Барқи тоҷик”, ҶСК “Тоҷик Эйр”, ҶСК “Фурудгоҳи байнулмилалии Душанбе”, КВД “Роҳи оҳани Тоҷикистон” ва ҶСК “Ширкати алюминии тоҷик” дар номгӯйи “корхонаҳои сатҳи ҷумҳуриявӣ” зикр шудаанд.
Раиси Кумитаи андоз Нусратулло Давлатзода моҳи феврали ҳамин сол 7 корхонаҳои аз ҳама зиёд қарздорро аз рӯйи пардохти андоз номбар кард:
«Тоҷиктелеком» (86 млн сомонӣ);
НБО РОғун (67 млн сомонӣ);
«Ширкати алюминии тоҷик» (38 млн сомонӣ);
НБО «Сангтӯда – 1» (36 млн сомонӣ);
Фурудгоҳи Душанбе (31 млн сомонӣ);
«Талко Ресурс» (17 млн сомонӣ);
«Алюминсохтмон» (16 млн сомонӣ).
Ҳукумат ҳанӯз соли 2019 ба Вазорати молия ва дигар вазорату идораҳои марбута дастур дода буд, ки дар мавриди кам кардани қарзҳои корхонаҳои бузурги давлатӣ чораҷӯйӣ шавад.
Бо ин мақсад Шӯрои ҳамоҳангсоз оид ба масоили идоракунии хавфҳои молиявии корхонаҳои давлатӣ таъсис дода шуд.
Ин мақомоти нави машваратии назди ҳукумат бо мақсади ҳимоя аз манфиатҳои молиявӣ ва амволӣ, ҷорӣ кардани идоракунии маъмурӣ ва баланд бардоштани самаранокии фаъолияти корхонаҳои давлатӣ, ки ҳиссаи давлат дар онҳо беш аз 50%-ро ташкил медиҳад, таъсис дода шуд.
Айни замон ҳудуди 800 корхона бо сармояи давлатӣ ба қайд гирифта шудааст, ки нисбатан бузургтаринашон байни онҳо бо сармояи зиёди давлат инҳо мебошанд: ҶСК «Ширкати алюминии тоҷик» (100%), ҶСК «Роғун» (95%), ҶСК «Тоҷиктелеком» (95%), воҳидҳои «Барқи тоҷик» (100%), ҶСК «Тоҷиктрансгаз» (100%), ҶСК «Фурудгоҳи байнулмилалии Душанбе» (100%), ҶСК «Тоҷик Эйр» (100%), ҶСК «Сементи тоҷик» (100%).
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
