Шаҳрванди Тоҷикистон Марзия Сангова, ки пас аз ҷарроҳӣ бо фарзандаш дар Ҳиндустон банд мондааст, ба “Азия-Плюс” муроҷиати видеоӣ фиристода, дархост намуд, ки барои баргаштан ба хона ба кумак ниёз дорад. Ӯ мегӯяд, барои дар Ҳиндустон мондан дигар маблағ надошта, боз дар Душанбе як духтари 7-солаи дигар дорад.
Марзия Сангова дар навори видео ба ҳамаи тоҷикистониён барои кумак ба ҷарроҳии духтараш изҳори миннатдорӣ намуда, хҳиш мекунад, ки акнун бори дигар барои ба ватан баргаштан кумак кунанд.
“Ду моҳ боз дар Ҳиндустонам ва бар асари қатъи алоқаи ҳавоӣ ба хона баргашта наметавонам. Хоҳиш мекунам, ки моро бо ҳавопаймоҳо (Сомон Эйр, – Эзоҳи идора)-е, ки ба Ҳиндустон меоянд, ба хонаамон баргардонед. Барои ин ҷо мондан дигар имкону маблағ надорам. Дар Душанбе боз як духтари 7-сола дорам ва аз ин рӯ, мехоҳам, ки ҳарчи зудтар ба хона баргардам. Илтимос, моро ба ватан баргардонед”, – мегӯяд ин зан.
“Дар ВКХ ва сафорат ба мо кумак накарданд”
Раҷаб Ҳалимов, роҳбари ташкилоти ҷамъиятии “Дилсӯзӣ”, ки Марзия ва духтараш Оминаро барои ҷарроҳӣ ба Ҳиндустон фиристод, ба “Азия-Плюс” дар ин робита изҳор намуд, ки онҳо аллакай чандин бор ба Вазорати корҳои хориҷӣ (ВКХ)-и ҷумҳурӣ ва сафорати Тоҷикистон дар Ҳиндустон муроҷиат намуда, лекин то ҳол ягон посухи мушаххас нагирифтаанд.
“Духтарча муваффақона ҷарроҳӣ шуд, лекин ҳозир онҳо баргашта наметавонанд, чунки бо Ҳиндустон алоқаи ҳавоӣ нест. Ҳавопаймоҳои мо ҳозир донишҷӯёнеро, ки пас аз супурдани имтиҳонҳо ба хонаҳояшон, ба Ҳиндустон бармегарданд, аз Душанбе бароварда истодаанд. Аз Ҳиндустон бошад, мусофир намегиранд. Иҷрои 10 парвоз ба нақша гирифта шуда, 6-7 парвоз аллакай анҷом дода шудааст”, – иброз дошт Ҳалимов.
Ба гуфтаи ӯ, муроҷиат ба ВАО умеди охирини онҳост, зеро дар дигар вазорату идораҳо ба ин мушкили онҳо расидагӣ нашуд.
“Ба занги ман аз ВКХ посух доданд, ки ин масъала ҳал шуда истодааст. Ба сафорати Ҳиндустон дар Тоҷикистон ҳам муроҷиат кардам, онҳо гуфтанд, ки “аз ҷониби мо ҳеҷ мушкиле нест". Боз ба сафорати Тоҷикистон дар Ҳиндустон муроҷиат кардам, он ҷо гуфтанд, ки онҳо ин масъаларо ҳал намекунанд”, – шарҳ дод роҳбари ташкилоти “Дилсӯзӣ”.
Дар ҳамин ҳол, дар сафорати Тоҷикистон дар Ҳиндустон ба ӯ гуфтаанд, ки барои ба хона баргардонидани 60 нафар шаҳрвандон, ки аз Ҳиндустон ба ватан баргаштанианд, маъқулшумории ин масъаларо аз ҷониби ВКХ интизоранд.
“Дар сафорат гуфтанд: “Интизорем ва ҳар рӯз дархост медиҳем. Ба ҷуз ин кӯдак, ин ҷо беморону низомиён, донишҷӯён ва ба сурати умум 60 нафар ҳастанд. Агар иҷоза диҳанд, ҳамаашонро бо як ҳавопаймо ба ватан бармегардонем”, – гуфт ӯ.
Дар ташкилоти “Дилсӯзӣ” ҳамчунин талош варзидаанд, ки тариқи Тошканд билет дарёбанд, зеро чун Дубай аз Ҳиндустон парвоз қабул намекунад, ҳамаи шаҳрвандони Амороти Муттаҳидаи Араб, ки дар Ҳиндустон қарор доранд, тариқи Тошканд парвоз мекунанд. Дар он ҷо ҳам билет наёфтаанд.
“Намефаҳмам, чаро бо парвозҳое, ки донишҷӯёни Ҳиндустонро аз ин ҷо мебароранд, шаҳрвандони моро аз он ҷо овардан мумкин нест. Мо омодаем, ки онҳоро ба карантин гирифта, ҳамаи қоидаҳоро риоя кунем, лекин агар парвозҳо ба охир расанд, пас онҳо чӣ гуна баргашта метавонанд? Албатта, бо шариконамон дар Ҳиндустон ҷиҳати ёрӣ ба модару духтар барои бозгашт гуфтушунид дорем. Метавон як, ду ва се ҳафта кумак кард, лекин аллакай ду моҳ сипарӣ шуд”, – изҳор дошт Ҳалимов.
То замони нашри хабар ба “Азия-Плюс” муссар нашуд, ки шарҳи ВКХ-ро дар бораи ин масъала бигирад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
