Дар “Лужники”-и шаҳри Маскав Маркази нави ваксинзанӣ аз COVID-19 боз шуд, ки асосан барои кор бо хориҷиён пешбинӣ шудааст. Дар ин бора дар сомонаи раиси шаҳри Маскав хабар дода мешавад.
“Ин марказ яке аз бузургтарин дар ҷаҳон буда, дар як шабонарӯз ҳудуди 15 ҳазор нафарро қабул карда метавонад”, – гуфтааст раиси шаҳри Маскав Сергей Собянин зимни боздид аз ин маркази нав.
Бо қарори Вазорати тандурустии Русия, ваксинзании шаҳрвандони хориҷӣ бо ваксинаи яктаркибаи «Спутник Лайт» гузаронидда мешавад, ки дар Маркази миллии таҳқиқотии эпидемиологӣ ва микробиологияи ба номи Н.Ф.Гамалеи таҳия шудааст.
Маблағи ваксинзанӣ, ки 1300 рублро ташкил медиҳад, аз ҷониби шаҳрвандони хориҷӣ тариқи терминалҳои махсус ё мутамарказ аз тарафи корфармо пардохта мешавад. Дар бунгоҳҳои ваксинзанӣ риояи қоидаҳои бехатарии эпидемиологӣ таъмин карда шудааст.
Баргузории ваксинзаниро 25 нафар табибон ва 99 нафар ҳамшираҳои шафқат аз дармонгоҳҳои шаҳр таъмин мекунанд. Ба онҳо 99 нафар кормандони марказҳои хизматрасонии давлатии “Мои документы” (Ҳуҷҷатҳои ман) ва 123 нафар маъмурон ёрӣ мерасонанд.
Барои гирифтани ваксина шаҳрвандони хориҷиро лозим аст, ки шартнома баста, ҳуҷҷатҳоеро пешниҳод намоянд, ки қонунӣ будани ҳузури онҳоро дар қаламрави Русия тасдиқ намояд.
Ваксинзании гурӯҳҳои муташаккил бо дархости корфармоҳо гузаронида мешавад, ки ба пешниҳоди маҷмӯи пурраи ҳуҷҷатҳо ба ҳар як корманди хориҷӣ уҳдадоранд. Ҳамчунин корфармо ба нуқтаи ваксинзанӣ овардани кормандонро дар вақти пешакӣ мувофиқашуда ташкил мекунад. Аз ваксинзанӣ гузаштан бо гувоҳнома (сертификат)-и коғазӣ тасдиқ ва ба корфармо дода мешавад. Корфармо сипас онро ба корманди худ медиҳад. Шахсони воқеӣ гувоҳномаро дар ҳамин ҷой ваксинзанӣ мегиранд. Истинод ба гувоҳномаи рақамӣ (QR-код) бо СМС-паёмак меояд. Рақами телефонеро, ки QR-кодро ба он фиристодан лозим аст, корманди маркази “Мои документы” муайян намуда, онро ба низоми ЕМИАС ворид мекунад.
Нуқтаҳои ваксинзанӣ дар “Лужники” ҳамарӯза (бе рӯзи истироҳат) аз соати 10:00 то 22:00 кор мекунанд. Ба ҷуз “Лужники” ваксинзании шаҳрвандони хориҷӣ аз COVID-19 дар нуқтаҳои бозшуда дар Маркази бисёрсоҳавии муҳоҷирати “Сахарово” ва маркази савдои “Садовод” гузаронида мешаванд.
Ҳамчунин аз 7 июл шаҳрвандони хориҷӣ барои ваксинзанӣ ба нуқтаҳое, ки дар заминаи шуъбаҳои пулакии 25 дармонгоҳи шаҳр кушода шудаанд, муроҷиат карда метавонанд. Ваксинро метавон тариқи сабти пешакӣ бо телефон ва бидуни он ҳам гирифт.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
