Раёсати беҳдошти замин ва обёрӣ дар вилояти Суғд ба ҳисоби зиёни садамаҳои пойгоҳу нассосҳои обкашӣ шуруъ кардааст, ки ба сабаби гоҳу ногоҳ хомӯшкуниҳои барқ ба миён омадааст. Ин ниҳод гуруҳи вижаеро созмон додааст ва баъди мушаххас шудани ҳаҷми зарар мехоҳад онро ширкати “Барқи тоҷик” ҷуброн кунад.
Аминҷон Абдуллозода, сардори Раёсати беҳдошти замин ва обёрӣ дар вилояти Суғд зимни нишасти хабарӣ гуфт, давоми як моҳи ахир дар натиҷаи маҳдудият ва гоҳу ногоҳ хомушкуниҳои барқ 25 пойгоҳу нассосҳои обкашӣ ба садама дучор шудааст. Ӯ гуфт дар натиҷаи чанд ҳафта аз кор мондани пойгоҳҳо киштзорҳо дар ноҳияҳои Бобоҷон Ғафуров, Ашт, Мастчоҳ, Конибодом, Спитамен ба танқисии об дучор шуданд.
“Мисол ногаҳон дар ноҳияи Бобоҷон Ғафуров дар як рӯз ду маротиб ҳам барқро хомӯш карданд, аз ҳамин ҳисоб нассосҳои пойгоҳҳои мо аз кор мебарояд, баъдан об омада зада ядакаш мешиканад ва ё об расида ҷойи дигараш месӯзад. Ҳамин гуна ҳолат дар пойгоҳи обкашии ноҳия “Хоҷабақирғон 1 ва 2”, “Сумчак 1 ва 2”, “Сомғор 1 ва 2” бисёр зиёд шуд. Мо тайёрие, ки тирамоҳу зимистон дида будем ҳамаи он тайёрӣ барбод рафт. Мо аз дигар ин пойгоҳҳоро таъмир кардем, шабурӯз бачаҳо 10-15 рӯз умуман хоб нарафта кор карданд.”
Ӯ афзуд маблағи зарари расида ба пойгоҳҳои обкаширо ҳоло як гуруҳи махсуси мутахассисон ҳисоб карда истодаанд ва рӯзҳои наздик дақиқ месозанд. Ба гуфтаи Аминҷон Абдуллозода онҳо ба раиси вилояти Суғд, роҳбарияи Агентии беҳдошти замин ва обёрӣ ва ба ширкати “Барқи тоҷик” ин мушкилро дар гузорише ирсол кардаанд.
“Мо гузориш навишта санад тартиб додем, ки кадом рӯзҳо барқ қатъ шуд. Ҳоло зарари расида ба пойгоҳҳоро ҳисоб мекунем ва мо ба “Барқи тоҷик” пешниҳод мекунем, ки зарарро ҷуброн кунад. Гуфтушунид рафта истодааст, мо дар ин масъала корбарӣ карда истодаем”.
Дар тобистони имсола сокинон дар вилояти Суғд аз маҳдуд шудани неруи барқ дар охирҳои моҳи июн ва оғози июл шикоят карда гуфтанда буданд барқ бе реҷаи махсус ва гоҳу ногоҳ ҳамарӯза дар соатҳои гуногун хомӯш мешавад. Гуруҳе аз сокинон шикоят доштанд, ки дар рузҳои гармои тобистон ба далели набудани барқ пойгоҳҳо кор накарданд ва киштзорҳо низ беоб мондаанд. Аммо ҳоло зарари расида бо ин сабаб ба киштзорҳо ва пойгоҳҳои обкашӣ пурра ҳисоб нашудааст.
Қаблан Муҳиддин Аҳмадзода, роҳбари шабакаҳои интиқоли барқи Суғд ба “Азия-Плюс” гуфта буд дар натиҷаи якбора гарм шудани ҳарорати ҳаво дар ҳамаи трансформатори зеристгоҳҳо хавфҳои садамавӣ ба миён омад ва ба хотири пешгирӣ аз корношоямшавӣ барқро хомӯш карданд. Ӯ гуфта буд нассоҳо ва пойгоҳҳои обкашӣ ба фарқ аз солҳои пешин дар он шабу рӯз зиёдтар кор кард ва дар натиҷа бори зеристгоҳҳои барқӣ низ зиёд шуд.
Аммо сардори Раёсати беҳдошти замин ва обёрӣ дар вилояти Суғд Аминҷон Абдуллозода гуфт, онҳо пойгоҳҳои “Мирзочӯл 1-2” ва “Қизилӣ” дар ноҳияи Зафарободро ба шабакаи интиқоли барқи Ӯзбекистон пайваст карданд ва ҳоло бори зеристгоҳҳои шимоли Тоҷикистон камтар шуда, мушкил то ҷое ҳал гардидааст.
Бино ба иттилоъ 70 дарсади заминҳои кишоварзӣ дар вилояти Суғд тариқи пойгоҳҳои обкашӣ обёрӣ мешавад ва ҳамасола барои таъмири пойгоҳҳо мақомот миллионҳо сомонӣ ихтисос медиҳад. Аммо аксари пойгоҳҳо кӯҳнаву фарсуда шуда ҳангоми кам ё зиёд шудани шиддати барқ низ ба садама дучор мешаванд ва инро масъулин низ инкор намекунад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
