Раисҷумҳури Тоҷикистон Эмомалӣ Раҳмон дар ҷаласаи роҳбарони СҲШ аз вазъи Афғонистон, махсусан вилояти Панҷшер бори дигар изҳори нагаронӣ намуд ва гуфт, ки чандин маротиба аз созмонҳои байналмилалӣ, аз ҷумла Созмони Милали Муттаҳид (СММ), Кумитаи байналмилалии Салиби Сурх дархост кардааст, ки ба ин кишвар, махсусан, ба вилояти Панҷшер кӯмак кунанд.
Ӯ гуфт, Панҷшер чанд вақт аст, ки дар муҳосираи комил аст ва “Толибон”-ро ба бастани роҳи кӯмакҳои башардӯстона ба ин дара гунаҳкор намуд.
Эмомалӣ Раҳмон гуфт, гурӯҳи Толибон талош дорад як ҳукумати султаталабро ташкил кунад.
– Низоми сиёсӣ дар Афғонистон бояд бар асоси майли мардум бошад, бидуни ягон дахолат аз ягон кишвар ва дикта кардани навъи сохтори сиёсӣ. Бидуни ҳузури ҳамаи гурӯҳҳо ташкил кардани ҳукумат дар Афғонистон метавонад вазъиятро бадтар кунад. Бинобар ин дар назар бигирем, ки ҳаққи мардуми Афғонистон аст, ки ҳукуматро таъин кунанд, – гуфт Эмомалӣ Раҳмон.
Нигаронии тунди Эмомалӣ Раҳмон дар ҳолест, ки дирӯз, 16 сентябр ҳам ӯ “Толибон” (ҳаракати фаъолияташ дар Тоҷикистон мамнӯъ)-ро танқид карда, онҳоро ба ваъдахилофӣ дар бораи ташкили ҳукумати фарогир бо иштироки васеи дигар неруҳои сиёсӣ ва қавмҳои этникӣ дар ин кишвар гунаҳкор намуда буд.
Эмомалӣ Раҳмон дирӯз, ҳамчунин аз вазъи дараи Панҷшер ёдоварӣ карда, гуфт, аҳвол дар онҷо бадтар аз он аст, ки дар расонаҳо менависанд.
– Мувофиқи маълумоте, ки ҳар рӯз аз манотиқи мухталифи Афғонистон ба мо мерасанд, вазъи воқеӣ дар маҳал комилан дигар аст, он чанд маротиба бадтар аз онест, ки дар расонаҳо инъикос карда мешавад. Мо инро дар мисоли Панҷшер возеҳ дида метавонем, – афзуд ӯ.
Беш аз як моҳ мешавад, ки “Толибон” Афғонистонро тасарруф кардаанд. Ягона минтақае ки то ба ҳол зери тасарруфи Толибон нест, дараи Панҷшер аст. Дар онҷо Ҷабҳаи муқовимати миллӣ бо роҳбарии Аҳмад Масъуд – писари Қаҳрамони миллии Афғонистон Аҳмадшоҳи Масъуд ташкил шудааст. “Толибон” баъди ҳамла ба Панҷшер эълом карданд, ки ин вилояти Панҷшерро комилан тасарруф кардаанд. Аммо Нерӯҳои муқовимати миллӣ мегӯянд, ки Панҷшер ба сурати комил суқут накардааст ва муқовимат идома дорад.
Бо гузашти беш аз як моҳ Толибон то ҳол ҳукумати расмии худро эълон накардаанд. Бо ин вуҷуд онҳо чанд рӯз пеш ҳайати ҳукумати худро эълон карданд. Вале кишварҳои ҷаҳон дар шинохт ва эътирофи “Толибон” шитобкорӣ намекунанд. Онҳо “Толибон”-ро барои нақзи ҳуқуқи инсон ва дигар ҷиноятҳо гунаҳкор медонанд.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
