Вазорати нақлиёти Русия ҳушдор дод, ки талабот ба доштани QR-код (он далели эмкунӣ бар зидди коронавирус ё бемории ковиди чанде пеш паси сар кардаро тасдиқ мекунад) ҳам ба мусофирони ширкатҳои ҳавопаймоии Русия ва ҳам хориҷӣ дахл хоҳад дошт, хабар медиҳад ТАСС бо такя ба гуфтаҳои муовини вазири нақлиёти Русия Кирилл Богданов.
"Ин қонун натанҳо нисбати ширкатҳои ҳавопаймоии Русия, балки тамоми ширкатҳое, ки дар қаламрави Русия парвоз мекунанд, мавриди амал қарор мегирад ва онҳо огоҳ карда мешаванд", – зикр кардааст ӯ.
Богданов ҳамчунин тавзеҳ додааст, ки Вазорати нақлиёт масъалаи додани кумакпулӣ (субсидия)-ро ба ширкатҳои ҳавопаймоӣ баррасӣ мекунад, аммо ҳаҷми онҳо ҳоло муайян нашудааст.
"Масъалаи кумакпулиро ба ширкатҳои ҳавопаймоӣ баррасӣ дорем ва мефаҳмем, ки шояд барои онҳо дар тиҷорат мушкилоте пеш ояд. Ҳоло гуфта наметавонам, ки ҳаҷми он чӣ қадар мешавад", – иброз доштааст вай.
Дар ҳамин ҳол, тавре ки хабаргузории «Ведомости» бо такя ба номаи муовини вазири нақлиёт Игор Чалик ба ҳукумат ва вазорати молияи Русия иттилоъ медиҳад, дар робита ба ҷорӣ шудани QR-кодҳои ҳатмӣ барои парвозҳои ҳавоӣ, Вазорати нақлиёт пешниҳод кардааст, ки ба соҳаи авиатсия 8 млрд ҷубронпулӣ пардохт шавад: 7 млрд ба ширкатҳои ҳавопаймоӣ ва 1 млрд – ба фурудгоҳҳо.
Вазорати нақлиёт тахмин мекунад, ки бинобар ҷорӣ шудани QR-кодҳо, ҷараёни ҳамлу нақли ҳавоӣ 50% коҳиш ёфта, даромади фурудгоҳҳо дар моҳи декабр 1,06 млрд рубл камтар мешавад.
Ба гуфтаи Богданов, Вазорати нақлиёт умедвор аст, ки қонуни ҳукумат дар бораи санҷиши ҳатмии QR-кодҳо дар ҳавопаймоҳо ва дигар навъи нақлиёт то охири соли 2021 қабул шуда, аз 1 феврали соли 2022 мавриди амал қарор мегирад.
Гуфта мешавад, то 1 феврали соли 2022 ба ҷуз QR-код, ПСР-тест бо натиҷаи манфии коронавирусро низ истифода бурдан мумкин аст. Дар назар аст, ки QR-кодҳо то 1 июни соли 2022 (тибқи нақша то ба 80% расидани сироятнопазирӣ (иммунитет)-и дастаҷамъона) амал мекунад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
