Раиси вилояти Суғд Раҷаббой Аҳмадзода ҳамроҳи шаҳрдори Исфара Баҳоваддин Баҳодурзода захмиёни даргириҳои марзии рузи 27-уми январро дар Беморхонаи марказии шаҳри Исфара аёдат намуда, ҳамчунин, бо сокинон деҳаи Хоҷаи Аълои ҷамоати деҳоти Чоркӯҳи Исфара дидор кард.
Аз ин пештар, Аҳмадзода барои ҳамдардӣ ба хонавода ду қурбонии ин рӯйдодҳо рафта буд. Дар ин бора дафтари матбуотии раиси вилояти Суғд хабар медиҳад.
Манбаъ менависад, раиси вилоят дар суҳбат бо сокинон гуфт, хонаҳои зарардида дар муҳлати кутоҳ барқарор карда мешавад.
Раҷаббой Аҳмадзода аз натиҷаи гуфтушуниди гурӯҳҳои кории Тоҷикистону Қирғизистон ба сокинон маълумот дода гуфтааст, минбаъд пеши роҳи муноқишаҳои марзӣ сари вақт гирифта мешавад.
– Аз мардум даъват ба амал оварда шуд, ки ҳушёриву зиракиро аз даст надиҳанд, – менависад дафтари матбуотии раиси вилоят.
Манбаъ мегӯяд, Раҷаббой Аҳмадзода дар беморхонаи марказии шаҳри Исфара ба ҷароҳатбардоштагон аз номи раисҷумҳури Тоҷикистон Эмомалӣ Раҳмон кӯмакҳои моливу пулӣ расонида, гуфтааст, ки табибони варзида ва мутахассисони соҳаи тандурустии вилоят саломатии захмиёнро барқарор намуда истодаанд.
– Раванди табобат зери назорати роҳбарияти мақомоти иҷроияи ҳокимияти давлатии вилояти Суғд қарор гирифта, дар асоси супориши Президенти мамлакат тамоми лавозимоти зарурӣ ва доруворӣ дастрас карда шудааст,- навиштааст манбаъ.
Бояд гуфт, ки имрӯз, ҳамчунин, Раҷаббой Аҳмадзода ба хонаи яке аз кушташудагони даргириҳои охири марзӣ байни Тоҷикистон ва Қирғизистон сокини деҳаи Хоҷаи Аъло Обидҷон Тӯйчиев рафта, ба пайвандони ӯ аз номи ҳукумати Тоҷикистон изҳори тасаллият намуда буд.
Ӯ дар мулоқотҳои худ гуфтааст, вазъи баамаломада зери назорати мақомоти ҳифзи ҳуқуқ қарор дорад ва раисҷумҳури Тоҷикистон Эмомалӣ Раҳмон раванди ҳалли масъалаҳои марзиро зери назорати худ гирифта, барои ҳалли саривақтии он мақомоти дахлдорро вазифадор намудааст.
Ёдовар мешавем, ки шоми 27 январ дар марзи Тоҷикистон ва Қирғизистон даргирии навбатӣ сар зад, ки дар натиҷа 2 сокини Исфара кушта ва ҳудуди 20 тани дигар захмӣ шуданд. Ҷониби Қирғизистон аз захмӣ шудани 11 нафар шаҳрванди худ хабар медиҳад. Тоҷикистон Қирғизистонро барои оғози тирпаронӣ муттаҳам мекунанд, аммо кишвари ҳамсоя моро гунаҳкор медонад.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
