Ба Кодекси граждании Ӯзбекистон меъёрҳое ворид шуд, ки дар онҳо ҷуброни зарар ва зиёни маънавӣ ба ҷабрдидагон аз шиканҷа ва дигар навъҳои рафтори пастзанандаи шаъну эътибор дар ҷараёни тафтиш пешбинӣ шудааст. Дар Тоҷикистон ин чӣ гуна аст?
Президенти Ӯзбекистон Шавкат Мирзиёев рӯзи 29 март қонунро дар бораи тағйирот ба Кодекси гражданӣ имзо кард, ки ба такмили тартиби ҷуброни зиёни ҷабрдидагон аз шиканҷа равона шудааст. Он аз 30 март мавриди амал қарор гирифт.
Тавре ки хадамоти матбуоти Вазорати адлияи Ӯзбекистон хабар медиҳад, мувофиқи ин санад, зараре, ки ба шахс дар натиҷаи истифодаи ҳама гуна навъи шиканҷа ва дигар навъҳои рафтору муҷозоти бераҳмона, ғайриинсонӣ ё пастзанандаи шаъну эътибор расонида шудааст, дар ҳаҷми пурра аз ҷониби давлат ҷуброн карда мешавад.
Меъёрҳои воридшуда ба амалҳои содиршуда аз ҷониби мақомоти санҷиши то тафтишот, бозпурсӣ ва тафтишоти пешакӣ, прокуратура ва суд дахл дорад.
Дар мо чӣ гуна аст?
Дар шарҳи ин масъала ҳуқуқшиноси ТҶ “Маркази мустақили ҳифзи ҳуқуқҳои инсон” Абдураҳмон Шарипов изҳор намуд, ки дар қонунгузории Тоҷикистон имрӯз меъёрҳои мушаххасе нестанд, ки дар онҳо аз ҷониби давлат дар ҳаҷми пурра ҷуброн шудани зарари расида ба шахс бар асари истифодаи ҳама гуна навъи шиканҷа ва дигар навъҳои рафтору муҷозоти бераҳмона, ғайриинсонӣ ё пастзанандаи шаъну эътибор дар ҷараёни тафтишот пешбинӣ шуда бошад.
“Дар таҷриба зимни баррасии даъвоҳои ҷуброн методҳои дақиқу фаҳмои муайян кардани ҳаҷми маблағи ҷуброн муқаррар нашудааст. Мутобиқи қонунгузории амалкунанда, додрасҳо (судяҳо) дараҷаи азобу шиканҷаи ҷисмонӣ ва маънавиро мувофиқи эътиқод ва фаҳмиши ботинии худ муайян мекунанд.
Маблағе, ки ба ҷабрдида ва дар сурати марги онҳо, ба наздикон пардохта мешавад, на ҳамеша мувофиқ ва одилона аст.
Илова бар ин, худи ҷабрдидаҳо ва аҳли хонаводаи онҳо солҳо боз дар ба дари судҳо (додгоҳҳо) гашта, ҳуқуқи худро ба ҳар як сомонӣ талаб кардаву исбот мекунанд.
Ба гуфтаи Абдураҳмон Шарипов, ҳолатҳое ҳастанд, ки мақомоти судӣ кӯшиш мекунанд масъулияти ҷинояти шиканҷаро ба зиммаи шахси ҷдогона гузоранд, ки ҳангоми шахси мансабдор буданаш аз шиканҷа истифода кардааст.
Ба ин тариқ, мақомоти давлатӣ, ки бо сабабҳои гуногун содир шудани чунин ҷиноят имконпазир гаштааст, аз ҷавобгарӣ муҳофизат карда мешавад.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
