Палатаи ҳисоби Тоҷикистон дар пайи як аудит ё санҷиши молӣ дар Бонки миллии Тоҷикистон 1,2 млн сомонӣ зарари молиро ошкор кардааст.
Файзалӣ Аҳмадзода, муовини раиси Палатаи ҳисоби Тоҷикистон имрӯз, 14 июл дар дар ҳузури журналистон гуфт, ин маблағ аз ҳисоби молу маводи арзишдор, изофанависиии корҳои таъмирию сохтмонӣ, зарар аз фуруши амволи давлатӣ, талаби воситаҳои пулӣ, маблағи камҳисобгардида ва руйпӯшгардидаи андозҳо муайян шудааст.
Вале дар ҳамин ҳол гуфт, барои ин гуна камбудҳои молӣ дар Бонки миллӣ ҳоло касе ба ҷавобгарӣ кашида нашудааст.
– Айни ҳол нисбати касе чорае андешида нашудааст, зеро аудит нав ба анҷом расид. Ҳафтаҳои наздик ин ниҳод хулосаҳои худро ба ҳукумат пешниҳод хоҳад кард ва масъалаи муҷозот низ ба миён гузошта мешавад, – гуфтанд роҳбарияти ин ниҳод.
Ин бори аввал нест, ки Палатаи ҳисоб дар натиҷаи санҷиши молӣ ё аудит дар фаъолияти Бонки миллӣ зарари молиро ошкор мекунад. Соли 2015 низ Палатаи ҳисоби Тоҷикистон дар фаъолияти ин ниҳод камбудиҳоро ошкор намуда, алайҳи 6 корманди собиқи Бонки миллӣ санад тартиб дода, ба Додситонии кулл фиристода буд.
Палатаи ҳисоби Тоҷикистон дар маҷмӯъ, дар 6 моҳи соли ҷорӣ 89 чорабинии аудиторӣ гузаронида, ба маблағи 158,8 млн. сомонӣ зарари молиявиро ошкор кардааст. Аз ҷумла, дар натиҷаи гузаронидани аудити молӣ дар вазорату идораҳои давлатӣ беш аз 150 миллион сомонӣ камбуди молиро ошкор намудааст, ки он нисбат ба ҳамин давраи соли 2021 75,6 миллион сомонӣ зиёд мебошад.
