Коргардони тоҷик Барзу Абдураззоқов дар мавриди изҳороти вазири фарҳанг доир ба намоиши “Манқурт. Реквием"-и ӯ посух дод. Ба гуфтаи коргардон, посухи мукаммали худро нисбат ба қарори онҳо ӯ дар 30 саҳифа таҳия намуда, лекин ба хотири амнияти ҳамаи иштирокчиёни намоиш (спектакл) онро манзур намекунад.
Коргардони маъруф посухи худро дар саҳифааш дар Facebook нашр кард. Тавре ки ӯ зикр мекунад, посухи Зулфия Давлатзода, вазири фарҳанг, аз хулосаи Шӯрои бадеии Вазорати фарҳанги Тоҷикистон, ки рӯзи 6 июн дар шабакаҳои иҷтимоӣ ба паҳн шуд, фарқе надорад.
Ӯ менависад, пас аз манъи намоиш дар 30 саҳифа посухи худро ба Вазорати фарҳанг омода намуда, лекин онро пешниҳод намекунад, зеро яке аз иштирокчиёни спектакл Далери Имомалӣ ба ҳабс гирифта шуда, дар боздоштгоҳи тафтишотӣ қарор дорад.
“Ҳамаамон зери таҳдид қарор гирифтем. Барои тезутунд нашудани сарнавишти фоҷиабори Далер ва шиддати вазъ атрофи намоиш, маҷбур шудам, ки нашри посухи худ ба Вазорати фарҳангро як муддат мавқуф гузорам. Ҳар корро вақту соаташ меояд”, – гуфтааст Абдураззоқов.
Дар фарҷом коргардон аз Вазорати фарҳанг даъват намудааст, ки ба кори одамон халал нарасонанд.
Ёдрас мекунем, ки рӯзи сешанбе, 12 июл вазири фарҳанги ҷумҳурӣ Зулфия Давлатзода дар мавриди манъи намоиши “Манқурт. Реквием"-и коргардон Барзу Абдураззоқов изҳор намуд, ки он бо сабаби “аз матни аслии муаллиф, дур рафтани коргардон” манъ шудааст.
“Коргардон аз матни аслии муаллиф Чингиз Айматов дур рафта, ба он иловаҳои худро ворид ва муҳтавои асарро таҳриф кардааст. Намоиш бо чунин шаклу мазмун барои сиёсати имрӯзаи дохиливу хориҷии кишвар ва барои таълиму тарбияи насли наврас қобили қабул дониста нашуд, яъне аз ҷониби шӯрои бадеӣ пазируфта нашуд", – шарҳ дода буд вазири фарҳанги Тоҷикистон.
Намоиш (спектакл)-и "Манқурт. Реквием", аз рӯйи асари маъруфи нависандаи қирғиз Чингиз Айтматов "Дуроҳаи бӯронӣ" дар коргардонии Барзу Абдураззоқов таҳия гардид.
Қарор буд, ин намоишнома 20-уми май дар театри "Падида" намоиш дода шавад. Вале рӯзи 19 май мақомот нагузоштанд, ки он рӯйи саҳна биояд. Далели мақомот ин буд, ки намоишнома бояд аз назари шӯрои бадеӣ гузарад.
