Дирӯз, 4-уми октябр, президенти Русия бо як фармони худ ба президенти Тоҷикистон Эмомалӣ Раҳмон ордени “Барои хизмат дар назди Ватан” дараҷаи 3 тақдим намуд. Дар ин бора ТАСС хабар медиҳад.
«Барои саҳми арзанда дар таҳкими муносибатҳои шарикӣ ва иттифоқии стратегӣ байни Федератсияи Россия ва Ҷумҳурии Тоҷикистон, инчунин таъмини суботу амнияти минтақавӣ Эмомалӣ Раҳмон, Президенти Ҷумҳурии Тоҷикистон, бо ордени «Барои хизмат дар назди Ватан» дараҷаи III мукофотонида шавад», — гуфта шудааст дар матни фармон.
Гуфтан ба маврид аст, ки ордени мазкур дар арафаи зодрӯзи президенти Тоҷикистон, ки 5-уми октябр аст, тақдим карда мешавад.
Ёдовар мешавем, ки соли 2017 президенти Тоҷикистон Эмомалӣ Раҳмон “барои саҳми бузурги шахсӣ дар таҳкими равобити дуҷониба ва ҳамкориҳои Россия ва Тоҷикистон” аз ҷониби ҳамтои русаш Владимир Путин бо ордени «Александр Невский»-и низ мукофотонида шуда буд.
