Бозиҳои байналмилалии Делфии ҷавонони кишварҳои узви ИДМ дар шаҳри Душанбе ҷамъбаст гардид ва Тоҷикистон дар он ҷои аввал ва медали тиллоро ба даст овард. Дар ин бора Марям Холиқзода аз маркази матбуоти Вазорати фарҳанг ба “Азия-Плюс” хабар дод.
Ба гуфтаи Марям Холиқзода, ансамбли рақсии бачагонаи “Зебо” барандаи медали тиллои Бозиҳои байналмилалии Делфии ҷавонони кишварҳои узви ИДМ эълом гардиданд.
Ӯ гуфт, ин ансамбл рақси попуррӣ ва рақсҳои минтақавӣ, ки дар вилоятҳои Бадахшон, Суғд ва Хатлон хеле машҳур аст, намоиш дод.
“Ансамбли “Зебо”, ки на танҳо дар Тоҷикистон, балки берун аз он ҳам машҳур аст, бори дигар ҳайати доварони озмуни бошукуҳро ба ваҷд овард”, – афзуд Холиқзода.
Ҳамин тавр, номинаи “Созҳои нафасӣ” байни гурӯҳҳоҳи 14-17 ва 18-25-солаҳо тақсим гардида, ҷоизаҳо супорида шудааст.
Ба гуфтаи Марям Холиқзода, дар номинаи “Созҳои нафасӣ” бо дипломҳои махсус “Барои иҷроиши ифоданоки барномаи даври 1” Б. Ҳакимов ва “Барои иҷроиши олии намоишномаи оҳангсози миллӣ” Милана Хашимова, ҳарду аз Тоҷикистон, қадрдонӣ шуданд.
“Дар номинаи “Сарояндаи эстрадӣ” аз гурӯҳи 14 то 17-солаҳо Нилуфар Азизова аз Тоҷикистон сазовори ҷои аввал ва медали тило, Марина Гринёва аз Руссия ҷои дуввум ва медали нуқра, Сарвиноз Ҳамдамова аз Тоҷикистон ҷои севвум ва медали биринҷӣ гардиданд”, – афзуд Холиқзода.
Инчунин, бо дипломи махсус Шаҳриёр Шарифзода аз Тоҷикистон, Элзара Кураисова аз Қазоқистон ва Юсуфҷони Сангалӣ аз Тоҷикистон қадрдонӣ гардиданд.
Ба гуфтаи Марям Холиқзода, мувофиқи баҳогузории ҳайати ҳакамон дар номинаи мазкур дар синну соли аз 14 то 21 ансамбли «Ералаш»-и Русия сазовори ҷойи аввал ва медали тилло, ҷойи дуввум ва медали нуқра ба ансамбли Кафедраи хореографии Донишгоҳи давлатии фарҳанг ва санъати Беларус, ҷойи севум ва медали биринҷӣ ба гурӯҳи рақсии «Малика»-и Коллеҷи ҷумҳуриявии хореографии ба номи Малика Собироваи Тоҷикистон сазовор шудаанд.
“Бо дипломи махсус барои сатҳи баланди кори педагогӣ ансамбли рақсҳои халқии «Сибирские узори», дипломи махсус барои тарғиби анъанаҳои рақси миллӣ ансамбли «Бунафша»-и Донишгоҳи давлатии фарҳанг ва санъати Тоҷикистон ба номи М. Турсунзодаи Тоҷикистон сазовор гардиданд”, – афзуд ӯ.
Ёдовар мешавем, ки бори нахуст дар Тоҷикистон Бозиҳои VI Делфии ҷавонони кишварҳои узви ИДМ баргузор шуд. Дар ин бозиҳо беш аз 400 истеъдодҳои ҷавони аз 10 то 25 сола ширкат карданд, ки дар байнашон ҳунармандон, рассомон ва санъаткорон, аз ҷумла аз Русия, Белорус ва Қазоқистон ширкат доштанд.
