Имрӯз, 21 октябр, Президенти Ҷумҳурии Тоҷикистон Эмомалӣ Раҳмон ва Сарвазири Ҷумҳурии Арманистон Никол Пашинян ҳамдигарро ба муносибати 30-юмин солгарди барпо намудани робитаҳои дипломатӣ миёни ду кишвар бо ирсоли барқия табрик намуданд.
Дар барқияи табрикии Президенти Ҷумҳурии Тоҷикистон Эмомалӣ Раҳмон ба унвони Сарвазири Ҷумҳурии Арманистон Никол Пашинян аз ҷараёни инкишофи муносибатҳои дӯстӣ миёни кишварҳо қаноатмандӣ шудааст.
“Алоқаманди густариши рӯзафзун ва тақвияти минбаъдаи ҳамкорӣ бо Арманистон, ки бо он моро риштаҳои таърихии дӯстӣ ва ҳамкорӣ мепайванданд, ҳастем. Бовар дорам, ки бо саъю талошҳои муштарак муносибатҳои созандаи мо ба нафъи мардумонамон боз ҳам таҳкими бештар хоҳанд ёфт”, – гуфта мешавад дар барқияи табрикотии Эмомалӣ Раҳмон.
Дар барқияи табрикии Сарвазири Ҷумҳурии Арманистон Никол Пашинян ба унвони Президенти Ҷумҳурии Тоҷикистон Эмомалӣ Раҳмон таъкид мешавал, ки тайии се даҳсолаи гузашта муносибатҳои байни кишварҳои мо дар асоси устувори анъанаҳои дӯстӣ, эҳтироми якдигар ва ҳамдигарфаҳмии мардумонамон рушд ёфтаанд.
“Итминон дорам, ки муносибатҳои кишварҳои мо иқтидори назаррас доранд ва истифодаи комили он имкон медиҳад, ки ҳамкории байнидавлатии Арманистон ва Тоҷикистон ба сатҳи сифатан нав бардошта шаванд”, – зикр мегардад дар мактуби Никол Пашинян.
Ёдовар мешавем, ки Тоҷикистону Арманистон қаблан дар ҳайати Иттиҳоди Шӯравӣ қарор доштанд ва пас аз барҳамхӯрии ин иттиҳод дар соли 1991 истиқлолияти худро эълон карданд.
