Имрӯз, 24-уми октябр, Эмомалӣ Раҳмон, раисиҷумҳури Тоҷикистон, дар шаҳри Норак агрегати №1-и НБО “Норак”-ро баъд аз таҷдиду навсозӣ ба истифода додааст. Дар ин бора хадамоти матбуоти президенти Тоҷикистон хабар медиҳад.
Ба иттилои манбаъ, агрегати мазкур бо тавоноии 375 МВт мавриди истифода қарор гирифт ва фаъолияти он аз ҷониби Эмомалӣ Раҳмон бо гузоштани танга санҷида шуд, ки ба талабот ҷавобгӯ аст.
Ҳамин тавр, раисиҷумҳур бо рафти татбиқи Лоиҳаи таҷдид ва барқарорсозии ин иншооти гидроэнергетикӣ, ки аз моҳи марти соли 2019 оғоз гардида буд, шинос шудааст.
Бояд гуфт, ки Лоиҳаи мазкур ду марҳиларо дар бар мегирад ва дар марҳилаи аввал 3 агрегат ва дар марҳилаи дуюм 6 агрегат бо таҷҳизоти асосӣ ва ëрирасон таҷдид карда мешавад.
“Дар ин замина таҷҳизоти эҳтиëҷоти хусусии нерӯгоҳ, 3 ҳалқаи барқии маҷмӯи зеризаминӣ, дарбандҳои куравӣ, пойгоҳҳо, низоми идора ва назорати нерӯгоҳ пурра таҷдид шуда, 27 крани борбардор ва лифтҳо иваз карда мешаванд”, – омадааст дар хабари хадамоти матбуоти президент.
Манбаъ меафзояд, агрегати №1-и нерӯгоҳро пурра таҷдид намудаанд ва давоми се моҳи охир дар озмоиши истифодабарӣ қарор доштааст.
Гуфта мешавад, ҳоло таҷзияи агрегати №4-и ин неругоҳ идома дорад. Корҳои зиддизангзании дарбанди агрегатҳои рақами 2, 4, 5, 6, 8 ва 9 ҳам аллакай ба анҷом расонида, чунин корҳо дар агрегати №3 давом меëбад.
Ин дар ҳолест, ки дар мавсими тирамоҳ ва зимистон дар чандсолаи ахир дар манотиқ ва навоҳии кишвар “лимит”-и барқ ҷорӣ мешавад. Дар соли равон низ аз ахири моҳи сентябр дар минтақаҳои гуногуни кишвар интиқоли нерӯи барқ маҳдуд мегардад.
“Барқи тоҷик” ин бор ҳам гуфт, “дар рӯзҳои нисбатан гарми фасли тирамоҳ дар як қатор зеристгоҳҳо ва хатҳои интиқоли барқ корҳои таъмирӣ гузаронида мешаванд”.
