Эмомалӣ Раҳмон, раисҷумҳури Тоҷикистон имрӯз, 27-уми октябр, дар шаҳри Остона, дар нахустин мулоқоти сарони давлатҳои Осиёи Марказӣ ва Иттиҳоди Аврупо иштирок ва суханронӣ кард.
Хадамоти матбуотии роҳбари давлат бо нашри чанд акс аз ин ҳамоиш хабар дод, ки Эмомалӣ Раҳмон зимни баромади хеш, чорабинии имрӯзаро боз як имкони хуби муҳокима ва ҳамоҳангсозии амалҳо дар пасманзари тағйироти геополитикии ҷаҳонӣ донистааст, ки ба таҳкими рушди созандаи ҳамкории байниминтақавӣ нигаронида шудааст.
ИЗОБРАЖЕНИЕ
Ӯ аз қабули Стратегияи нави Иттиҳоди Аврупо барои кишварҳои Осиёи Марказӣ изҳори қаноатмандӣ карда, ба роҳбарияти Иттиҳоди Аврупо ҷиҳати расондани кумак дар давраи пандемияи КОВИД-19 сипос гуфтааст.
“Таъкид гардид, ки Тоҷикистон кушишҳои рушди ҳамкориҳои байниминтақавӣ дар соҳаҳои иқтисод, нақлиёту коммуникатсия, обу энергетика ва дигар масъалаҳоро, ки ба рушди устувори минбаъдаи кишварҳои мо нигаронида шудаанд, комилан дастгирӣ мекунад”,- навиштааст Хадамоти матбуотии президент.
Президенти Тоҷикистон ҳамчунин оид ба имкони таҳкиму тавсеаи робитаҳои кишварҳо дар чаҳорчуби “Осиёи Марказӣ – Иттиҳоди Аврупо” дар соҳаҳои ояндадори тиҷоратию иқтисодӣ, амнияти озуқаворӣ, кишоварзӣ, нақлиётию логистикӣ, энергетика, ҳамкорӣ дар самти “нерӯи сабз”, ҷумла тавассути истифодаи самараноки захираҳои гидроэнергетикӣ, андешаронӣ кардааст.
“Тағйирёбии иқлим, обшавии пиряхҳо, афзоиши обхезӣ ва омадани сел, хушксолӣ ва таъсири манфии ин падидаҳо ба вазъи иқтисодию иҷтимоии кишварҳо таъсири манфӣ мерасонанд, аз масъалаҳои муҳиме буданд, ки вобаста ба ҳалли онҳо Сарвари давлат муҳтарам Эмомалӣ Раҳмон пешниҳодҳои асоснок манзур намуданд”, – омадааст дар хабари Хадамоти матбуоти Президенти ҶТ.
Эмомалӣ Раҳмон дар ҳошияи ин нишаст бо президенти Иттиҳоди Аврупо Шарл Мишел мулоқот карда, маҷмуи васеи масоили ҳамкории Тоҷикистон бо Иттиҳоди Аврупоро баррасӣ кард.
“Дар рафти мулоқот таҳкими шарикӣ бо Иттиҳоди Аврупо дар маблағгузории татбиқи лоиҳаҳои “Иқтисоди сабз”, “Иқтисоди рақамӣ”, таъсиси “Паркҳои технологӣ”, “Технологияҳои рақамӣ” ва ҷорӣ намудани Низоми “Савдои электронӣ” дар Тоҷикистон ба манфиати ҳар ду ҷониб маънидод гардид”,- навишт Хадамоти матбуотии президенти Тоҷикистон.
Ҳамчунин, ҷонибҳо қазияи Афғонистон ва ҳамкориҳоро дар самти ҳифзи сарҳад дар чаҳорчӯби татбиқи барномаҳои БОМКА ва КАДАП мавриди муҳокима қарор доданд.
Ҷониби Иттиҳоди Аврупо гуфтааст, ки дар масоили Афғонистон Тоҷикистонро шарики муҳими худ ҳисобида, минбаъд низ дар ҳалли қазияи ин кишвари ҳамсоя, бахусус, мустаҳкам намудани сарҳади Тоҷикистону Афғонистон ҳамкориҳои муфидро роҳандозӣ хоҳад намуд.
