Дар Тоҷикистон нархномаҳо ба хидматрасониҳои пулакии тиббӣ дар муассисаҳои давлатӣ ва хусусии тиббӣ барои соли 2023 бояд дар сатҳи амалкунанда бетағйир нигоҳ дошта шаванд.
Тавре ки Хадамоти зиддиинҳисории назди ҳукумати ҷумҳурӣ хабар медиҳад, ин ба муассисаҳои тиббии навтаъсис ва хидматрасониҳои пулакие, ки нав ҷорӣ карда мешаванд, дахл надорад.
Ин қарори Хадамоти зиддиинҳисорӣ бо мақсади иҷрои дастури ҳукумати Тоҷикистон аз 19 декабри соли 2022 қабул шудааст.
Мувофиқи фармоиши Хадамот, ба Раёсати ҳифзи ҳуқуқи истеъмолкунандагон, ва назорати фаъолияти рекламавӣ, Раёсатҳо ва Шуъбаи Хадамоти зиддиинҳисорӣ дар ВМКБ, вилоятҳои Суғду Хатлон ва шаҳри Душанбе супориш дода мешавад, ки ҷиҳати дар амал татбиқ намудани фармоиши мазкур тадбирҳои зарурӣ андешида, назорати иҷрои онро таъмин намоянд.
Зикр мешавад, ки нархномаи хидматрасониҳои нақшавии пулакии тиббӣ дар муассисаҳои давлатӣ ва хусусии тиббии Тоҷикистон (муассисаҳои тиббии навтаъсис ва хидматрасониҳои пулакии нав) дар соли 2023 тибқи талаботи қонунгузории зиддиинҳисорӣ дар заминаи калкулятсия ва асосноккунии иқтисодии пешниҳодшуда таҳлил карда шуда, бо тартиби муқарраргардида ба мувофиқа расонида шаванд.
Ҳамчунин тибқи фармоиши дигари Хадамоти зиддиинҳисорӣ аз 22 декабр, нархномаҳои хидматрасонии пулакии таълимӣ дар муассисаҳои давлатӣ ва ғайридавлатии таҳсилоти ибтидоӣ, миёна ва олии касбии Тоҷикистон барои соли таҳсили 2023-2024 дар сатҳи амалкунанда (ба истиснои ихтисосҳое, ки нав ҷорӣ карда мешаванд) бетағйир ба мувофиқа расонида шаванд.
