Соли 2022 дар вилояти Хатлон 12 ҳолати никоҳ бо шаҳрвандони хориҷӣ ба қайд гирифта шудааст. Аз ин, дар 8 ҳолат мардони тоҷик бо шаҳрвандони хориҷӣ ақди никоҳ бастаанд, дар 4 ҳолат духтарони тоҷик шавҳари хориҷӣ кардаанд.
Дар ин бора Ҳакимзода Абдусаттор, намояндаи шуъбаи сабти ҳолати шаҳрвандии вилояти Хатлон, имрӯз, 1-уми феврал, зимни нишасти матбуотӣ иттилоъ дод.
Ӯ гуфт, ки шаҳрвандони Тоҷикистон бештар аз ҳама бо шаҳрвандони Русия ақди никоҳ бастааст. Дар зинаи баъдӣ давлати Ӯзбекистон қарор доштааст.
“Дар ҳамаи ҳолатҳои бастани ақди никоҳ бо шаҳрвандони хориҷӣ, байни ҷонибҳо аҳднома ба имзо расидааст”, – гуфт Ҳакимзода Абдусаттор.
Дар маҷмӯъ, соли 2022 дар вилояти Хатлон 25 ҳазору 396 ҳолати ақди никоҳ ба қайд гирифта шудааст, ки нисбати соли 2021 698 ҳолат кам мебошад.
