Дар шимоли Тоҷикистон алайҳи як сокини 23-солаи шаҳри Истаравшан, ки дар захмӣ кардани ҳамсараш ва бародари ноболиғи ӯ гумонбар дониста мешавад, парвандаи ҷиноӣ боз шудааст, хабар медиҳад маркази матбуотии ВКД ҶТ.
Гуфта мешавад, ки гумонбаршуда рӯзи 9-уми феврал тахминан соати 23:00 ба хонаи волидайни ҳамсараш, ҷавонзани 19-солаи сокини шаҳри мазкур даромадааст.
Ба иттилои манбаъ, ҳангоме ки ҳамсараш хоб будааст, бо корд 3-4 маротиба ба аъзои бадани ӯ ва 1 маротиба ба бадани додарарӯсаш, ноболиғи 8-сола, ки дар паҳлӯи ҳамсараш хоб буд, задааст.
“Дар натиҷа номбурдагон ба саломатиашон ҷароҳатҳои ҷисмонӣ бардоштаанд”, – омадааст дар хабари ВКД.
Тавре дар хабар омадааст, мард аз ҳиссиёти рашк ба ин амали бераҳмона даст задааст. Зимнан зикр мегардад, ки оид ба ин ҳодиса тафтишот идома дорад.
