Оҳангсозони Тоҷикистону Ӯзбекистон дар Душанбе се рӯз Фестивали муштараки мусиқӣ баргузор мекунанд. Дар ин бора Амирбек Мӯсоев, раиси Иттифоқи оҳангсозони Тоҷикистон (ИКТ) ба “Азия-Плюс” иттилоъ дод.
Ба гуфтаи ӯ, ин тасмим дар сафари ҳайати расмии ИКТ ба Ӯзбекистон дар ҳафтаи гузашта матраҳ гардида, қабул шудааст.
“Ин фестивал бо ташаббуси Иттифоқи оҳангсозони Тоҷикистон се рӯз дар Душанбе роҳандозӣ мешавад. Аз кишвари ҳамсоя 6 нафар композиторон ва бастакорони шинохта ба Тоҷикистон меоянд”, – шарҳ дод Мӯсоев.
Амирбек Мӯсоев гуфт, ин фестивал рӯзҳои 24-уми май дар Иттифоқи оҳангсозони Тоҷикистон, 25-уми май дар Театри Опера ва балети ба номи Садриддин Айнӣ ва 26-уми май дар Консерваторияи миллии Тоҷикистон баргузор хоҳад шуд.
ИЗОБРАЖЕНИЕ Амирбек Мусоев
Тавре ӯ афзуд, ҳайати оҳангсозон ва бастакорони Ӯзбекистон бо роҳбарии раиси Иттифоқи оҳангсозон ва бастакорони Ӯзбекистон Рустам Абдуллоев озими Душанбе хоҳанд шуд. Онҳоро Ҳабибулло Раҳимов, муовини раис ва Мустафо Вафоев, Дилором Саидаминова, Ойиддин Абдуллоева, Акмал Сафаров – оҳангсозон ва Элнура Мирзокамолова – навозанда ҳамроҳӣ хоҳанд кард.
“Дар ин фестивал ҳамаи композиторон ва бастакорони аъзои Иттифоқи оҳангсозони Тоҷикистон ширкат мекунад. Ин ҷо асарҳои нав ва классикӣ ба намоиш гузошта мешавад”, – афзуд ҳамсӯҳбати мо.
Бояд гуфт, як сол қабл бо ташаббуси Сафорати Тоҷикистон чунин консерт дар Ӯзбекистон баргузор шуда буд. Гуфта мешавад, акнун бори нахуст ҳайати Иттифоқи оҳангсозон ва бастакорони Ӯзбекистон ба Тоҷикистон меоянд.
Ёдовар мешавем, ки вақтҳои охир равобити фарҳангии Тоҷикистону Ӯзбекистон жарфтар гардида, сафарҳои ҳунармандон бештар мешавад. Масалан, охирин сафари ҳунармандони кишвари ҳамсоя ба Тоҷикистон охири соли гузашта иттифоқ афтода буд. Он замон Театри лухтаки Бухоро бори аввал ба Душанбе омад.
