Падари Сунатулло Инагамов, як сокинои ноболиғи ноҳияи Панҷ дар вилояти Хатлон, иддао дорад, ки Фитрат Раҳмонзода, комиссари ҳарбии ноҳия писарашро латукӯб кардааст.
Илҳом Бобоев, падари ҷабрдида, дар ин бора ба “Азия-Плюс” иттилоъ дода, гуфт, писараш “ҳоло дар ҳолати вазнин ва дар беморхона бистарӣ шудааст”.
Худи комиссар ҳодисаро шарҳ надодааст. “Asia-Plus” омодааст назари ӯро низ интишор намояд.
Ба гуфтаи Илҳом Бобоев, ин ҳодиса соати 22:00-и 24-уми апрел рух дода, Фитрат Раҳмонзода, комиссари ҳарбии ноҳияи Панҷ, писари 18-сола, хонандаи синфи 11-ро иҷборан ба комиссариати ҳарбӣ бурдааст ва дар утоқи кориаш латукӯб кардааст.
“Сунатулло баъди дарс дар яке аз нуқтаҳои мошиншӯйи кор мекунад. Шаби 24-уми апрел Фитрат Раҳмонзода, комиссари ҳарбии ноҳияи Панҷ, назди нуқтаҳои мошиншӯӣ рафта, хостааст, ки мошини ӯро бе навбат шӯяд. Сунатулло рад карда, гуфтааст, ду нафар дар навбат аст ва танҳо баъди ду мошин, мошини комисарро мешӯяд”, – гуфт Илҳом Бобоев.
Ба қавли падари Сунатулло “пас гирифтани ҷавоби рад, ғазаби комиссар баланд шуда, кормандонашро гуфтааст, ки ин “бачаро ба комиссариати ҳарбии ноҳия баранд”. Дар комиссариати ҳарбӣ Сунатуллоро барои “гапгардонӣ” сарзаниш карда, сарашро қисман тарошидаанд”.
“Баъди тарошидани сараш, писарам эътироз мекунад ва аз комиссар мепурсад, ки чаро бо ӯ чунин дағал муносибат доранд. Баъди ин, Сунатуллоро латукӯб мекунанд ва ба ҷойи кораш оварда мепартоянд”, – гуфт Илҳом Бобоев.
Ба гуфтаи падари Сунатулло “писарашро саҳар ҳамкоронаш дар ҳолати вазнин ба беморхона мебаранд”.
“Натиҷаи ташхиси пешакии табибон мушаххас кард, ки беш аз ҳама сари писарам осеб дидааст ва шунавоии як гӯшаш паст гардидааст”, – гуфт Илҳом Бобоев.
Ӯ меафзояд, ки “аз прокуратураи гарнизони вилояти Хатлон баёноти Сунатуллоро гирифтанд, аммо ташхиси судӣ то ҳол хулосаи ниҳоии худро пешкаш накардааст”. Комиссар ҳам то ҳол ягон маротиба аз ҳоли Сунатулло хабар нагирифтааст.
Талошҳои мо барои гирифтани назари Фитрат Раҳмонзода, комиссари ҳарбии ноҳияи Панҷ, бенатиҷа буд. Аз Вазорати мудофиаи Тоҷикистон ҳам ба тамосҳои бардавоми мо ҷавоб надоданд.
Зикр кардан ба маврид аст, ки ҳоло дар кишвар маъракаи даъвати ҷавонон ба сафи артиш идома дорад ва ба андешаи коршиносон, рух додани чунин ҳодисаҳо, ҷавононро аз хидмат дар сафи артиш дилсард мекунад.
Ин ҳодисаи дуюм аст, ки вобаста ба артиш давоми ҳафтаи ҷорӣ расонаӣ мегардад. Оғози ҳафта дар шабакаҳои иҷтимоӣ наворе нашр гардид, ки дар он латукӯби наваскарон инъикос ёфта буд. Мақомоти масъул то ҳол ҳодисаро шарҳ надодаанд.
Танҳо Додситонии кулли Тоҷикистон иттилоъ дод, ки дар пайи ҳодисаи мазкур панҷ сарбоз ва сардори комендатураи якуми “Ворух”, қисми низомии вобаста ба нерӯҳои марзбонии Кумитаи давлатии амнияти миллиро боздошт кардаанд.
